జోడించు

గత వారాంతం మా  మనబడి డైరెక్టర్ గారు ఈ ఆట  ఒకటి  ఇచ్చి ఎలా ఉందో చూడమన్నారు. నిన్న రాత్రి నేను,మా అమ్మాయి ఆడాము. అరగంట సేపు అలా  ఆడుతూ కూర్చుండిపోయాము.  మా పిల్లలతో board games ఆడిన రోజులు గుర్తొచ్చాయి.  Scarbble ఆట ఆధారంగా రూపొందించారు. నేను Scarbble ఎప్పుడో ఒకటి రెండు సార్లు ఆడానేమో. తెలుగు లో ఆడటం సరదాగా అన్పించింది.  చాలా బావుంది. కాసేపు ఎలక్ట్రానిక్ గాడ్జెట్స్ పక్కన పడేసి పిల్లల తో గడపాలి అనుకుంటే తప్పకుండా కొనాలనే చెప్తాను.  రూపొందించినవారి  సృజనాత్మకని చాలా మెచ్చుకోవాలి.  ఆసక్తి ఉన్నవారు  ఈ వెబ్సైటు  చూడండి . 

http://jodinchu.out-box.co.in/products/jodinchu/

img_2438

నేను, మా అమ్మాయి ఆడిన ఆట

 

img_2440

img_2439

ప్రకటనలు

మొక్కు

పెళ్ళిళ్ళు, పుట్టు వెంట్రుకలు, పరీక్షలు, ఎంట్రన్సులు  దేనికైనా ఆపద మొక్కుల వాడిని తలచుకోని  తెలుగు కుటుంబం ఉందంటే అతిశయోక్తి కాదు. ప్రపంచం లో వాటికన్ సిటీ తర్వాత రెండవ స్థానం లో  ఉన్న మతపరమైన సందర్శనా  ప్రదేశం తిరుపతి.  భారత దేశం లో ఎన్ని దేవాలయాలకి ట్రస్ట్ లు ఉన్నాయో నాకు తెలీదు కానీ  ఈ దేవాలయానికి టీటీడీ  ట్రస్ట్ మరియు దానికి  ఒక IAS అధికారి ఎగ్జిక్యూటివ్ ఆఫీసర్. దేవాలయానికి ఎంత రాబడి ఉండకపోతే ఇటువంటి ట్రస్ట్ ఉంటుంది ? వడ్డీ కాసుల వాడి  దర్శనం చేసుకోవడానికి టాక్సీలు, రైళ్లు, బస్సులు, విమానాలు ఎక్కి వచ్చే భక్తులు. ఆ బస్సులకు బస్టాండ్లు, రైళ్ల కి రైల్వే స్టేషన్, విమానాలకు విమానాశ్రయం.  భక్తుల కి సదుపాయాలు ఇస్తూ వారికి  ధర్మసత్రాలు, అన్నదానాలు. అవి నచ్చని వారికీ  హోటళ్లు. స్వామి పేరు మీద విశ్వవిద్యాలయాలు, ఆసుపత్రులు,  చెప్పుకుంటూ పోతే అంతే లేదు ఈ  ఏడుకొండల వాడి  దయ మీద  బ్రతికే వారి గురించి !!

నిన్న ముఖ పుస్తకం తెరవగానే  కనిపించిన చిత్రం –  మొక్కుబడి చెల్లించుకుంటున్న  కెసిఆర్ గారి కుటుంబం.  ఒకటి కాదు దాదాపు నాలుగైదు టపాలు.  ‘ప్రజల సొమ్ము ని గుడి పాలు  చేయడానికి ఈయన కి హక్కు ఎక్కడిది’  అని ఒకరు, ‘Shameless’ అని ఇంకొకరు. ‘దేవుడికి అలంకారం అవసరమా,పేదలకి  ఇవ్వవచ్చు కదా’ ’ అని  మరొకరు.  ఉమ్మడి రాష్ట్రం గా ఉన్నపుడు అందరూ  ఆ స్వామి సొమ్ము తిన్నవారే కదా ?   సొమ్ము ఎక్కడికి వెళ్తోంది ?  కోట్లు గడించి తిరిగి భక్తులకి తెచ్చిపెట్టే ఆ స్వామికే కదా ?  ఈ మధ్య ‘పేదలకి  ఇవ్వవచ్చు కదా’ అన్న మాట వింటే నాకు చిర్రెత్తుకొస్తోంది. మనం రోజుకో దుస్తులు వేసుకుంటాం, రోజుకో రకమైన రుచి తో  భోజనం  తింటాము, వీలైతే రోజుకో నగ పెట్టుకుంటాం. 80 ఏళ్ళు, మహా అయితే  90 ఏళ్ళు ఉండే ఈ జీవితానికి  ఇన్ని సుఖాలు కావాలా ?  మరి మీరు కూడా సంపాదించేది అంతా పేదలకి  ఇచ్చి సన్యాసం పుచ్చుకోవచ్చు కదా ?  మీరు సన్యాసులు అవ్వరు కానీ ఇన్ని వేలమంది ప్రతి రోజు ఆయన సొమ్ము తింటుంటే ఆ స్వామి  మాత్రం నిరాడంబరం గా ఉండాలా  ? ఇదెక్కడి న్యాయం ? ఆయన  ఒక రాతి విగ్రహం  కాబట్టి ఆయనకేమి అక్కర్లేదు అనుకుంటే  మీకు ఏమి చెప్పనవసరం లేదు.  

పరమతస్తుడైన తానీషా శ్రీరామకల్యాణానికి  ముత్యాల తలంబ్రాలు పంపి  తన భక్తి చాటుకున్నాడు.  కెసిఆర్ అయినా, తానీషా అయినా పరమాత్ముడు వినియోగించుకున్న పనిముట్లు.  అందుకే  మీకు టీవీ లైవ్ లో  కెసిఆర్ కన్పిస్తే  మా లాంటి వారికీ ఆ నగలు పెట్టుకున్న పరమాత్ముడు కనిపించాడు.

ఎంత మాత్రమున ఎవ్వరు తలచిన అంత మాత్రమే నీవు _/\_  !!

బొమ్మలకొలువు

క్రిస్మస్, ఆంగ్ల నూతన సంవత్సరం వేడుకలు అయిన వారానికే  మా ఇంట్లో బొమ్మల కొలువు హడావిడి మొదలు.  పేరుకి పిల్లలకోసం అని పెట్టినా వాళ్ళకంటే నాకే సరదా  ఎక్కువ అని చెప్పాలి.   బేస్ మెంట్  లో డబ్బాలలో  సర్దిపెట్టిన బొమ్మలు తీయటం, మెట్లు పేర్చటం, అలంకరించడం అంతా కలిపి ఒక వారం రోజులు పడుతుంది.  చాలా పెద్ద పని అనుకోవచ్చు.  ఉత్సాహాన్ని ఇచ్చే పనే కాబట్టి  పేర్చేటపుడు పెద్ద పని గా ఏమి అనిపించదు. అంత కష్టపడి పేర్చిన కొలువు వెనువెంటనే తీయాలా  అనుకుంటూ , మూడోరోజుకి శాస్త్రానికి ఒక బొమ్మ పక్కన పెట్టి దాదాపు ఒక నెల రోజులు కొలువు ని అలానే ఉంచేస్తాము.

img_2359

మా అత్తగారింట్లో బొమ్మలకొలువు ఆనవాయితీ ఉంది. అందుకే ప్రతి ఏడూ క్రమం తప్పకుండా పెట్టడానికే ప్రయత్నిస్తాము. ప్రతి ఏడాది కొత్తవి కొన్ని చేరుతాయి కొలువులో.  ఇండియా వెళ్లి వస్తే ఎక్కువ అవుతాయి.  ఈ సారి భారత దేశం వెళ్ళినపుడు   దక్షిణ భారత యాత్ర చేసాము. అందుకే కొన్ని గవ్వల బొమ్మలు కొలువు లో ప్రవేశించాయి.  వాటిని చూసి నేను, మా చిన్నమ్మాయి ఇక్కడే craft store లో  గవ్వలు కొని అటువంటివే ఇంకా కొన్ని బొమ్మలు చేసాము.  నా చిన్నప్పటి బొమ్మలు ఎగ్జిబిషన్ లో  కొనుక్కున్నవి, మా అమ్మమ్మ బొమ్మలాట కి నాకోసం కొన్న స్టీలు గిన్నెలు (నెల్లూరు వైపు బుడ్లు అంటారు) ఇంకా దాచుకున్నాను.

img_2344
నేను, మా చిన్నమ్మాయి చేసిన బొమ్మలు

ఇది వరకు బొమ్మలు ఒక క్రమం లో కాకుండా నాకు నచ్చిన రీతిలో పెట్టేసేదాన్ని. మనబడి గురువులొకరు ఈ విధం గా చెప్పారు. అప్పటినుండి ఆ విధం గా పెట్టడానికే ప్రయత్నిస్తుంటాను. బొమ్మలకొలువు మన జీవిన విధానం చెప్తుంది.  ఒక్కొక్క మెట్టు  ఎక్కి దైవ సాన్నిధ్యానికి చేరుకోవాలి అన్నదే జీవిత లక్ష్యం. అందుకే క్రింద నుంచి పైన వరకు మెట్లు ఇలా పెట్ట్టాలి .

  • జంతువులు,
  • రోజు వారి జీవితం – అంగడి, గిన్నెలు, ఇంట్లోని సామాగ్రి అటువంటివి,
  • మహా పురుషులు, యోగులు
  • దేవతా మూర్తులు, ఇంటి ఇలవేలుపు.

img_3135

img_3136

img_3137

img_3134

img_3139

 

బొమ్మల కొలువు విశిష్టత గురించి ఈమాట లో కూడా  ఒకసారి చదివాను.

ఇది లంకె : http://eemaata.com/em/issues/201511/7936.html

మా ఇంట బొమ్మల కొలువు వీక్షించిన వారందరికీ ధన్యవాదాలు _/\_