వింటే భారతమే వినాలి – 2

ఒక అంత్యేష్టి సంస్కారానికి వెళ్లి విచలిత మనసుతో  ఉన్న నన్ను  మా వారు, మా అమ్మాయి  భగవద్గీత ప్రవచనం కి తీసుకెళ్లారు.  అక్కడ స్వామిజీ  చెప్పిన  కర్మ యోగ శ్లోకం 21  మనసు ని బాగా పట్టుకుంది. నాకు భారతం లో ఇంకో కోణం కూడా కన్పించింది.  

అరణ్య పర్వం లో  కొలను దగ్గర చనిపోయిన తన అతి పరాక్రమ వంతులైన  నలుగురి తమ్ముళ్లను చూసి విచలితుడు అయి కూడా ఓర్పు తో యక్షప్రశ్నలకి సమాధానం ఇచ్చాడు ధర్మరాజు. అంత బాధలోనూ ఒక్క తమ్ముడికే  జీవితం ప్రసాదిస్తాను అంటే, మాద్రి కొడుకైన నకులుడిని  ఇవ్వమని అడిగాడు.   యక్ష ప్రశ్నలలో నన్ను ఎప్పుడూ  ఆలోచింప చేసే ప్రశ్న  – ఏది ఆశ్చర్యం? (ప్రాణులు ప్రతిరోజూ మరణిస్తూ ఉండడం చూస్తూ మనిషి తానే శాశ్వతంగా ఈ భూమి మీద ఉండి పోతాననుకోవడం) ( వికీ సౌజన్యం తో ).

భగవద్గీత, విష్ణు సహస్రనామం  రెండూ  కూడా పంచమ వేదం గా భావించే  మహాభారతమే  ప్రసాదించింది. చాలా మంది భావన ఏంటంటే జీవితం చివరి దశ లో ఉన్నపుడు  భగవద్గీత  చదువుకోవాలి అని.  అది సరి కాదు.   భగవద్గీత మనిషి కి  మానసికం గా చాలా బలం, స్వాంతన  చేకూరుస్తుంది.  ఆ విషయాన్నీ మనము పూర్తిగా విస్మరిస్తున్నాము.  నేను అమెరికా లో  కొందరి జీవితాల గురించి విన్నాను.  వారి జీవితాలలో అన్ని కష్టాలు ఉన్నాయి అంటే ఆశ్చర్యపోయాను.  చెపితే నమ్మరేమో కానీ  వారు అనుసరించిన మార్గం భగవద్గీత !!

ఇలా ఎన్నో విషయాలు చెప్పే రామాయణ  మహాభారతాలని చదివి లేదా విని మనం స్ఫూర్తి పొందాలి, నేర్చుకోవాలి. అవి  వదిలేసి(ఆక్షేపిస్తూ ), ఎన్ని పుస్తకాలూ చదివినా నేర్చుకునేది ఏమి ఉండదు అంటాను నేను.  ముఖ్యం గా యువతరం వీటిని చదవాలి. సమాజం చదివేటట్లు చేయాలి. ఇవేవో మత గ్రంధాలు అనుకుంటే అక్కడే పెద్దపొరపాటు చేస్తున్నట్లు లెక్క.  రామాయణ భారతాలు  వినవలసిన రీతి లో వింటే ఎంతటి కౌన్సిలింగ్ కూడా పనికి రాదు.

చాగంటి వారి మాటల్లో “ఇతిహాసము – ఇతి హా అసము. ఇది ఇలాగే జరిగినది, ఇది ఇంకొకలా జరిగినది కాదు”.  రామాయణ భారతాలు యదార్థగాథలు అని ఖచ్చితం గా నమ్మే వాళ్ళల్లో నేను ఒక దాన్ని. ఈ రోజుల్లో చాలా మంది చేసే వాదన ‘ ఇలా జరిగాయా పెట్టాయా!! అన్నీ  కట్టు కథలు’ . నాకు ఇంకొక చిరాకు కలిగించే విషయం. రామాయణ భారతాలని  Indian Mythology అనటం. Mythology అంటే Collection of myths. పోనీ  Myth అనే  అనుకున్నా –  కథ ల్లో కాలక్రమం  ఎలా ఉంటుంది? కట్టు కథలే అయితే ఇంత పెద్ద కథలు వ్రాయటానికి జరిగిన విషయాలే  కొంత కల్పితం జోడించి కథ గా మలచి ఉండచ్చు కదా. కౌముది పత్రిక లో మల్లాది వెంకట కృష్ణ మూర్తి గారు, యద్దనపూడి సులోచన రాణి గారు వారి ఒక్కొక్క నవల, ఆ పాత్రల గురించి  చెప్పారు. (వ్యాసాల  పేర్లు నాకు గుర్తుకు లేవు ). నవలలలో కొన్నిపాత్రలు  వారి నిజ జీవితం లో తారసపడ్డారు !! ఈ మధ్య కథలు, కవితలు వ్రాసే వారు ఏ విషయం/అంశం  మీద ప్రేరణ చెంది వ్రాస్తున్నారో చెప్తున్నారు. మరి  వాల్మీకి, వ్యాసడంతటి  వారు వారి ఇష్టం వచ్చినట్లు కల్పితం వ్రాస్తారా?

తెలుగు ప్రథమ భాష గా చదువుకున్న నా లాంటి దానికే   కవిత్రయం వ్రాసిన ఆంధ్ర మహా భారతం చదివే శక్తి  భగవంతుడు ప్రసాదించలేదు.  అందుకే  శ్రీ  చాగంటి కోటేశ్వర రావు గారి లాంటి మహానుభావులు  చెప్తున్నది వింటుంటే ఎవరో పూనుకుని ఆయన తో చెప్పిస్తున్నట్లే అన్పిస్తుంది _/\_.  సాంకేతిక పరిజ్ఞానం తో Sri changanti.net ద్వారా కొన్ని వేల మైళ్ళ దూరం లో ఉన్న మా లాంటి వారందరికీ  అందజేస్తున్న వారికీ శతకోటి నమస్కారాలు.

ప్రకటనలు

వింటే భారతమే వినాలి – 1

చాగంటి వారి మహాభారతం వింటున్నాను.  ఆది పర్వం, సభా పర్వం  అయ్యాయి.  తెల్సిన వారొకరు  ముందు విరాటపర్వం వినమని చెప్పారు. అందుకని విరాట పర్వం మొదలు పెట్టాను. వింటున్నప్పుడు ఏదో మామూలు  కథ లాగా అనిపించినా, రోజు వారీ  జీవితం ఎక్కడో అక్కడ కనెక్ట్ అవుతున్నట్లే ఉంటుంది.

ఎప్పుడో వ్రాసి పెట్టుకున్న  టపా అంచెలంచెలు గా వ్రాస్తూ  రెండు భాగాలు గా ఈ రోజు  పూర్తి చేయడం అయింది.

ఒక రోజు చాగంటిగారి ప్రవచనం మహాభారతం ఆదిపర్వం 45 /51 భాగం  వింటున్నాను.  చివరగా దాదాపు అరగంట  ఉంది అనగా మరీ రాత్రి అవుతోందని  ఆపేసి పడుకున్నాను. మర్నాటి పొద్దున్న లేవగానే ఆపేసిన భాగం పెట్టాను. ఆ రోజు  నవరాత్రుల మొదటి రోజు.  మహత్తు ఏంటంటే మిగిలిన భాగం అంతా  కూడా  ద్రౌపది  దేవి గురించి.  ద్రౌపది దేవి ఒక అయోనిజ. అమ్మవారు  కాబట్టే అన్ని కష్ఠాలు భరించింది, ఆవిడ ఎవరు అన్నదాని  మీద  చాగంటి వారు ఆ అరగంట లో  ద్రౌపది  దేవి గురించి చాలా అద్భుతం గా వివరించారు.  ఆ కాస్త చాలు భారతం ఎందుకు అంత గొప్పదో తెలుసుకోవడానికి!! అనుకోకుండా ఈ  ఏడాది నవరాత్రులు ఆ విధం గా మొదలయినందుకు చాలా ఆనందం గా అన్పించింది.

ద్రుపదుడు అర్జునుడుని  అల్లుడు గా పొందడానికి  కూతురి పుట్టాలని యాగం చేస్తాడు.  ఆ యాగం నుంచీ  పుట్టిన ఆడపిల్ల  ద్రౌపది. మత్య్స యంత్రం చేధించిన వారికే పిల్లనిస్తాను అని స్వయంవర ప్రకటన ఇస్తాడు ద్రుపద మహారాజు.  అర్జునుడు మాత్రమే ఛేదిస్తాడు.  స్వయంవరానికి వచ్చిన రాజులంతా అర్జునుడు ఒక బ్రాహ్మణుడు అను.కుంటారు. మత్య్స యంత్రాన్ని చేధించినవాడు అర్జునుడే అన్న అనుమానం కూడా ఎవరికీ కలుగదు. ద్రౌపది కూడా బ్రాహ్మణుడే అనుకుని  అర్జునుడి మేడలో వరమాల వేస్తుంది.  స్వయంవరం తరువాత భీమార్జునులతో  వారు ఉన్న నివాసానికి వెళ్తుంది.  ఇవన్నీ అందరికీ  తెలిసిన విషయాలే !!

ఇక్కడ నుంచీ, వేరొక దృష్టి కోణం లో ఇక కొన్ని విషయాలు విన్నాక నాకు చాలా ఆశ్చర్యం వేసింది !! రోజూ  పంచ భక్ష్య పరమాన్నాలతో భుజించే ఆమె, పాండవులు భిక్షాటన చేసి తెచ్చిన భిక్షని అందరికీ  వడ్డించి తాను తింటుంది.  హంస తూలికా తల్పం పైన నిదురించే ఆమె, కటిక నేలపై పడుకుంటుంది. కుంతి  ఎలా చెప్తే ఆలా వింటుంది.  ఇక్కడ ఏంటంటే ఆవిడ దేనికి దుఃఖపడదు. పైపెచ్చు సంతోషం గా ఉంటుంది. పంచపాండవులందరినీ  పెళ్లి చేసుకోవడం లో కూడా  ఆవిడ నిర్ణయం ఏది లేదు.  ఆ విధం గా పెళ్లి చేసుకోవాల్సివచ్చినపుడు ఆవిడ  దుఃఖపడినట్లు  కూడా ఎక్కడా అనిపించదు.  ఇక్కడ ఒక విషయం చెప్పాలి. చాగంటి గారు  ద్రౌపదీ దేవి వివాహం గురించి చెబుతూ, ‘మీలో ఎవరైనా వ్యాసుడంతటి వాడు వచ్చి చెప్తే పిల్లని అలా  ఐదుగురికి ఇచ్చి వివాహం చేస్తారా లేక ద్రుపదుడిలాగా ఆలోచిస్తారా ? ‘ అని ప్రవచనం వింటున్నవారిని ప్రశ్నించారు.  ఎవరూ  సమాధానం ఇచ్చినట్లు అనిపించలేదు. ‘ ఎవరైనా మీలాగే ఆలోచిస్తారు. మీ ఆలోచన తప్పు కాదు. అలవాటు లేని ఆచారం అంటే ఎవరూ  ఆమోదించరు’ అన్నారు. (Sri changanti.net/ మహాభారతం/ఆది పర్వం 45/51  24:00-26:00).

ప్రతి విషయం లో  ద్రౌపది  దేవి చూపించిన ఓర్పు, ఆమోదం(acceptance) చూసి మనం నేర్చుకోవలసినది చాలా ఉంది అన్పించింది. స్వయంవరంలో మత్య్స యంత్రం చేధించిన వాడు ఎవరో ఆవిడకి తెలియదు. ఆవిడ తండ్రి చెప్పిన నిబంధన ప్రకారం  మత్య్స యంత్రం చేధించాడు, కాబట్టి వరమాల వేసి అతడితో వచ్చేసింది. “అయ్యో !!నేను అర్జునిడి ని చేసుకోవాల్సినదానను, కానీ ఇతను ఎవరో తెలీదు  ఇతని మెడలో  వరమాల ఎందుకు వేసాను” అని బాధపడలేదు.   అదే విధం గా  గమనించవలసినది   ఏంటంటే, ఏ విషయాన్నీ ఆమోదించకూడదో అది ద్రౌపది  దేవి ఆమోదించలేదు కూడా !! తనని అవమానించిన దుర్యోధన, కర్ణ, దుశ్శాసనులను విడిచిపెట్టనివ్వలేదు. యుద్ధం జరిగేలా చేసింది. దీని నుంచి నాకు అర్ధమయ్యింది ఏంటంటే ఒక  స్త్రీ మూర్తి  వ్యక్తిత్వం ఎలా ఉండాలో ఎలా ఉంటుందో  చెప్తుంది ద్రౌపది దేవి వ్యక్తిత్వం.  

విరాటపర్వం లో  కూడా  ద్రౌపదీ  దేవి గురించి చెప్పారు చాగంటి వారు.  ఆదిపర్వం లో కంటే విరాటపర్వం లో  బాగా చెప్పారనిపించింది. విరాటపర్వం లో ద్రౌపది, కుంతీ, గాంధారి ముగ్గురి గురించి చెప్పారు. (Sri changanti.net/ మహాభారతం/విరాట పర్వం 6/24 16:00- చివర && 7/24 మొదలు – 3:30). ప్రతి ఒక్కరు వినవలసినవి !!

ఈ ముగ్గురి స్త్రీ జీవితాలు చూపించి జీవితం లో ఏ తప్పులు చేయకూడదు అని భారతం చెప్పిందో, అటువంటి తప్పులు చేసే దిశ లోనే పయనం చేస్తూ ఫెమినిజం అంటూ రంగు పులుముతున్నారు సోషల్ మీడియా లో  ఈ మధ్య . పైగా కొన్ని అంశాల మీద టీవీ లో వాదోపవాదనలు, కథలు !!   

‘అమ్మాయి అత్తగారింటికే  ఎందుకు వెళ్ళాలి? అబ్బాయి అత్తగారింటికి రావచ్చు కదా!!’ .

‘పెళ్లే  చేసుకోవాలా ? సహజీవనం చేస్తే సరిపోదా ?’.

‘ మా బట్టలు మా ఇష్టం. ఏదైనా వేసుకుంటాం’ . ‘It’s my choice’ .

బట్టలు డిజైన్ చేసేవాడు దుశ్శాసనుడి  కంటే దారుణం గా ఆలోచించి ఆడపిల్లల దుస్తులు తాయారు చేస్తుంటే, దాన్ని ఫాషన్, ఛాయస్ అనే పేరు తో ఆమోదిస్తున్నాం.  మగవాడికి కూడా  అటువంటి  దుస్తులు తయారు  చేయమని అడగట్లేదు ఆడవారెవరూ  కూడా !! సినిమాల్లో, వాట్సాప్ లో  ఆడవారిని  అవమానిస్తూ జోకులు (ట). ఆడవారే వాటిని ప్రోత్సహిస్తుంటారు కూడా !!  భర్త పోయాక పుట్టింటికి వెళ్లకుండా ధైర్యం గా పిల్లలని తీసుకుని అత్తవారింటికి వెళ్లిన కుంతీ దేవిని చూసి తమకు తామై ఎలా నిలబడాలో నేర్చుకోవాలి ఈ రోజున ఆడపిల్లలు.

ఆసక్తి గా అనిపించే ఇంకొక విషయం.అర్జునుడికి ఏదైనా విద్య నేర్చుకోవాలంటే అన్నీ అనుకూలమే. కానీ కర్ణుడికి ప్రతిదీ ప్రతికూలం.  అందుకే కర్ణుడు, అర్జునుడి కంటే శక్తి వంతుడు. కానీ ఒక్కొక్కటి పోగొట్టుకుని కర్ణుడు బలహీనుడు అయ్యాడు. ఒక్కొక్కటి  అర్జునుడు  పొంది బలవంతుడయ్యాడు. (Sri changanti.net/ మహాభారతం/విరాట పర్వం 10/24 43:00-46:00 ) ఎందుకు అలా  జరిగింది అనేది ఒక జీవిత పాఠం. బలహీనుడయినా అన్ని అస్త్రశాస్త్రాలు  అర్జునుడు ఎలా సాధించాడు అనేది ఒక విద్యార్థి తెలుసుకోవలసిన ముఖ్యాంశం.

 

పదునైన ఆయుధం

జరుగుతున్న విషయాలు  చూస్తూ  చాగంటి గారు చెప్పిన ప్రవచనం కి  వాటిని ముడి పెడుతుంటే అన్పిస్తోంది, ప్రవచనాలు నా మట్టి  బుర్రకి కూడా ఎక్కుతున్నవీ అని!!  నేను ప్రవచనము చెప్పే స్థాయి కి రావాలంటే ఇంకో జన్మ ఎత్తా లేమో, కానీ నేను అన్వయించుకున్నది ఈ టపా లో విశిదీకరించడానికి ప్రయత్నిస్తాను.

చాగంటి గారు వారి ప్రవచనా ల్లో  ఒకటికి పది సార్లు చెప్తారు ‘మాట’ అనే దాని గురించి. రంపపు కోత  కంటే అనరాని మాటలే గాయపెడతాయి అన్నారట బలిజేపల్లి వారు.  మాటలు ఆచితూచి ఎలా మాట్లాడాలో రామాయణం చెప్తుంది అంటారు. నిజమే.  కొన్ని ఘట్టాలు ఉదాహరణలు గా చూసి చాలా  నేర్చుకోవాలి అనిపిస్తుంటుంది నాకు .

ముఖ్యం గా సుందరకాండ లో  హనుమంతుల వారు మాట్లాడిన తీరు, వాలి భార్య తార మాట్లాడే తీరు. ఈ రోజే కష్టేఫలి శర్మ గారు వారి బ్లాగులో వారు చాలా బాగా చెప్పారు “ఎంత చెప్పినా తక్కువే తార గురించి. సుగ్రీవుడు అప్పుడే దెబ్బలుతిని పోయినవాడు మరల తిరిగి వచ్చి, సింహనాదం చేస్తూ వుంటే తార, వాలిని, వెళ్ళవద్దని, బలమైన కారణం వున్నది కనకే మీతమ్ముడు తిరిగి వచ్చాడని, నిశిత పరిశీలనతో చెబుతుంది. హెచ్చరిస్తుంది. వాలి వినడు, అది వేరు. తన సంభాషణా చాతుర్యం తో, కోపంతో వచ్చిన లక్ష్మణుని చల్లపరుస్తుంది. చెప్పిన మాటలు చూడండి. ” చాలా కాలం కష్టాలు పడ్డాడు. ఇప్పుడే ఆయన రాజు అయ్యాడు. రాముని దయ వల్ల రాజ్యం, రుమా,నేనూ దక్కేము, భోగాలనుభవిస్తున్నా, రాముని పని మానలేదు సుమా………….”, అని మత్తుతో కనులు మూసుకుపోతున్న సమయంలో కూడా మాటాడగల్గిన చతుర. మరి కొంచం ముందుకెళితే కనబడేది, మండోదరి, యీమె కూడా తన సంభాషణా చతురత చూపింది కాని, రావణుని వంటి కాముకుని వద్ద పని చేయలేదు. సుందర కాండలో సీత హనుమల సంభాషణ వొక అద్వితీయ ఘట్టం. ఇద్దరు గొప్పవారు మాటాడితే యెలా వుంటుంది అన్నది, చదువుకుని ఆనందిచాలి, నాకు చెప్పగల తాహతు లేదని సవినయంగా మనవి చేసుకుంటున్నా. హనుమ నవ వ్యాకరణ పండితుడట.’’

తండ్రి కైకేయి కి ఇచ్చిన మాటకై   అడవులకి  వెళ్ళాడు శ్రీరాముడు. మారీచుడు రాముడిలా గొంతు పెట్టి అరిచినపుడు, రాముడికి ఏమయిందోనన్న ఆతృత తో  సీతా దేవి  లక్ష్మణ స్వామి తో ‘నన్ను చేపడదామని ఆలోచిస్తున్నావేమో’  అన్న అనకూడని  ఒక్క మాట రామాయణం నే మార్చేసింది.  ‘ఏడాది లంక లో ఉన్న సీత’ అన్న ఒక రజకుడి మాట విని భార్య నే పరిత్యజించాడు  శ్రీరాముడు. కుంతీ దేవి ‘బిక్ష ను అందరూ  పంచుకోండి’ అన్న మాట అసలు మహా భారతం కథనే నడిపించింది.

రామాయణ భారతాల నుంచి ఈ రోజుకి తిరిగి వచ్చేస్తే  …… డోనాల్డ్ ట్రంప్ గారు, ఓట్ల కోసం గత పద్దెనిమిది నెలలలో తన  నాలుక ఎటు తిరిగితే అటు మాట్లాడి , మాటలే ఆయుధాలుగా వాడుకుని  అధ్యక్షుడి పదవిని కైవసం చేసుకున్నారు. ఈ రోజున ఆ పదవి దొరికింది కానీ,  ఈ నిరసనలు, గోలలు చూస్తుంటే ఆయన  మాటలే  ఆయనకు పాశాలై  చుట్టుకుంటున్నాయి అన్పించింది.

కష్టేఫలి శర్మ గారన్నట్లు  “పంచేద్రియాలలో ఒకటైన నరం లేని నాలుక చేసేవి రెండే పనులు. ఒకటి రుచి చూడటం. రెండు మాట్లాడ్డం. “.  అసలు ఈ నాలుక ని నియంత్రించుకుంటే చాలేమో.  అన్నీ  విధాలుగా  బాగుపడచ్చు  🙂

కొసమెరుపు : ఈ టపా పెట్టే  ముందు యాధృచ్చికం గా చాగంటి గారి భారత ప్రవచనం విన్నాను. సభా  పర్వం  15/26  భాగం.  శిశుపాలుడు రాజసూయా యాగం లో కృష్ణుడి కి అగ్రపూజ చేసినందుకు ధర్మరాజు తూలనాడినప్పుడు మాట్లాడిన మాటలు. చివరి పదిహేను నిముషాలు చాగంటి వారు ‘మాట’ గురించే చెప్పారు. ఈ ఘట్టం లో శిశుపాలుడు గురించి చెప్తుంటే నాకు చాలా విషయాలు గుర్తొచ్చాయి. మోడీ నోట్లని రద్దు చేస్తున్నట్లు చెప్పగానే ముందు మాట్లాడేసింది కేజ్రీవాల్ గారనుకుంటా :). విషయం తెలియక ముందు చాలా మంది చాలా మెచ్చేసుకున్నారు. లైన్లలో నిల్చుని కాళ్ళు నొప్పి పుట్టగానే ‘ముందు వెనుక ఆలోచించకుండా ఈ పని ఏమిటి’ అంటున్న వారు మొదలయ్యారు.  నాలిక కదా ఎటు తిప్పితే అటు తిరుగుతుంది మరి !!  

చాగంటి వారు మరియు వారి ప్రవచనములు

ఇంట్లో రోజూ వారీ  పని, పిల్లలు, వాళ్ళ బడులు , హోంవర్కులు అనేవి అందరికీ  ఉండే   బాధ్యతలు.అమెరికా లో నివాసించే మా లాంటివారికయితే  రెండు సంస్కృతుల  మధ్య పిల్లల ని పెంచటం అనేది ఇంకా అదనపు బాధ్యత. ఈ వత్తిడి తట్టుకోవడానికి ఒక్కొక్కరం  ఒక్కో విధానం ఆచరిస్తుంటాము. పుస్తకాలు, సినిమాలు, పూజలు… ఇలా రకరకాలు. నేను అనుసరించే  విధానం తెలుగు పత్రికలు చదవటం, పాటలు, సంగీతం  వినటం. ఇలా అనుకోకుండా ఒక రోజు బ్రహ్మశ్రీ చాగంటి గురువు గారి ‘గంగావతరణ  ఘట్టం’ ప్రవచనము  వినడం జరిగింది. దీనిని గురించి  నా పాత టపా రామాయణం – ఒక అద్భుత కావ్యం లో చెప్పడం జరిగింది.  అలా చాలానే ప్రవచనాలు విన్నాను. ఏ  విషయమైనా ఇంకో కోణం లో నుంచి చూడటం మొదలు పెట్టాను.  ఆ విధం గా ప్రవచనాలు నన్ను నేను సంస్కరించుకోవడానికి, ఈ వత్తిడి నుంచి కాపాడుకోవడానికి  అన్పించింది.  

కానీ ఒక రెండు రోజుల క్రితం  అనుకోకుండా చాగంటి గారి ఇంటర్వ్యూ ఒకటి యూట్యూబ్ లో చూసాక ఆయన చెప్పిన విషయం విని అంతకుమించి ఆలోచించలేకపోయానే అనుకున్నాను.

ఇంటర్వ్యూ మొత్తం రెండు భాగాలు గా  ఉంది.  లంకెలు ఇస్తున్నాను.

మొదటి భాగం https://www.youtube.com/watch?v=D4jsD6ewKk8

రెండవ భాగం https://www.youtube.com/watch?v=20YxX5rECE0

ఆ ఇంటర్వ్యూ  లిఖిత పూర్వకం గా  ఈ లంకె లో ఉన్నది.  వీడియో చూడలేని వారు ఇది చదువుకొనవచ్చును.

http://www.sakshi.com/news/family/leelalu-stories-in-the-dark-is-not-a-service-to-the-community-273240

విజయ్ కుమార్  గారు చాగంటి వారి ని  “యువత కి సమాజ హితమే భక్తి అని చెప్పడానికి మీరేం చేస్తారు? ” అని ఒక ప్రశ్న వేశారు.  దానికి చాగంటి వారు చెప్పిన సమాధానం ప్రతి ఒక్కరు విని తీరాలి.  చాగంటి గారు ప్రవచించిన భాగవతం విని, బీటెక్  చదువుతున్న ఒక అమ్మాయి  చేసిన సమాజ సేవ గురించి వివరించారు.  అది నేను వివరించేకన్నా ఆయన చెప్పినది  వింటేనే  బావుంటుంది.

సాక్షి వారి వెబ్సైటు లోనే ఈ విధంగా వ్రాసారు:

“నేను ఒకప్పడు భాగవతం గురించి చెబుతూ కృష్ణలీలలన్నీ కథలు కాదు సమాజసేవని చెప్పాను. పూతన సంహారం సమాజసేవ. కాళీయమర్దనం యమునానది నీళ్లు పాడవకుండా చేసిన సమాజ సేవ. కృష్ణుడు సమాజ సేవలో సంతోషం పొందాడు. అవే మనం నేర్చుకోవాలని చెప్పా. ఆ తర్వాత కొద్దిరోజులకి ప్రవచనానికి వెళ్లిపోతుంటే ఒక పిల్ల వచ్చింది మా ఇంటికి. ఎవరు నువ్వనడిగితే బీటెక్ చదువుకుంటున్నాను, మీకు నమస్కారం చేయాలని వచ్చానంది. నేను ప్రవచనానికి వెళుతున్నానమ్మా మళ్లీ వెనక్కివచ్చి నీతో మాట్లాడే సమయం లేదన్నాను. మిమ్మల్ని ఇబ్బంది పెట్టను. మీరు కనబడ్డారు చాలు నమస్కారం అంది. ఇద్దరం లిఫ్టులో దిగుతుండగా నాకు నమస్కారం పెట్టాలని ఎందుకు అనిపించిందని అడిగాను. మీ మాటల వల్ల ప్రేరణ చెందానని చెప్పడంతో ఆశ్చర్యపోయి ఏం ప్రేరణ చెందావని అడిగా. మీరు చెప్పిన కృష్ణలీలలు సమాజ సేవన్నారు అది ప్రేరణ కల్పించిందని, నా స్థాయిలో సమాజ సేవ చేశానంది. కారెక్కబోతున్నవాడిని ఆగి ఏం సమాజ చేశావని అడిగాను. ప్రతిరోజూ ఒక గంట సేపు గవర్నమెంట్ హాస్పిటల్‌కు వెళ్లి ఓపీ కౌంటర్ దగ్గర కూర్చుంటానని, నిరక్షరాస్యులు, రూపాయి లేని వాళ్లకి, ఓపి టికెట్ రాయడం రానివారికి సహాయపడతానని చెప్పింది. వాళ్లకి వార్డులు చూపించి డాక్టర్ వద్దకు తీసుకెళ్లి, మందులిప్పించి పంపిస్తానంది. ఈ మధ్య ఇంట్లో కాలుజారి పడిపోయిన ఒక గర్భిణీని ఇక బతకదు అన్న స్థితిలో తీసుకొచ్చారు. ఆ సమయంలో తాను చేసిన ఉపకారం వల్ల ఆవిడ బతికి ఆడపిల్లకు జన్మనిచ్చిందని, ఆ పిల్లకు తన పేరు పెట్టుకున్నారని, అది తనకు ఎంతో తృప్తినిచ్చిందని చెప్పింది.

నేను కారెక్కి వెళ్లిపోతున్నవాడిని ఆగి ఆ పిల్లని వెనక్కి తీసుకెళ్లి పసుపు కుంకుమలు, బట్టలూ ఇచ్చి పంపాను. దీన్ని ఒకసారి టీవీ లైవ్‌లో చెప్పాను. దాన్ని చూసి చాలామంది పిల్లలు ఇది తమకు నచ్చిందంటూ తాము కూడా సమాజ సేవ చేస్తున్నామని ఉత్తరాలు రాశారు”  

చాగంటి గారివి కొన్ని గంటల  ప్రవచనాలు విన్నాను నేను. వినటానికి మాత్రం చక్కగా విన్నాను.  కానీ ఒక్కరోజు కూడా పైన చెప్పిన అమ్మాయి లాగా ఎందుకు ఆలోచించలేదు అని నన్ను నేను  ప్రశ్నించుకున్నాను.

ఇదంతా ఎందుకు చెప్తున్నాను అంటే – కొంతమంది ఆయన ప్రవచనాలు విని  సగమే అర్ధం చేసుకుని, మిగితా సగం వదిలేస్తున్నారు . అటువంటి వారు  చేసే చాదస్తపు  పనులు చూస్తే   చాగంటి వారంటే తెలియని వారికి  కూడా విసుగు కలుగజేస్తుంది.  దాని నుంచి ఆయనని చూస్తే తెలియని చికాకు, ద్వేషం మొదలవుతుంది.   ఉదాహరణ కి రోజుకి రెండుసార్లు సంధ్యావందనం చేయాలి అని  చెప్తే, అమెరికా లో మంచుతుఫాను పడ్డా ఇంట్లో పనులన్నీ ఆపేసి సంధ్యావందనం చేసే చాదస్తులు ఉన్నారు. గంధం పెట్టామా, బొట్లు పెట్టామా, కుడి వైపా , ఎడమ వైపా – ఇటువంటి చాదస్తాలు లెక్క ఉండవు !! నా అనుభవం లో ఒక ఉదాహరణ కూడా  చెప్తాను. అమెరికా లో దేనికి భయపడకపోయినా  అగ్గి అంటే భయపడతారు . ప్రతిదీ చెక్కలతో కట్టి ఉంటారు కాబట్టి. ఒక రోజు ఆయన, ‘ దీపం రోజు వెలిగించాలి ఇంట్లో’ అంటూ ఏదో చెప్తున్నారు. అది విని,  నాకున్న పరిస్థితి కి నూనె వేసి రోజూ దీపారాధన చేయలేను కదా. దేవుడి మందిరం లో ఒక చిన్న lamp పెట్టుకుని అదే దీపారాధన అనుకుంటాను. పండగ రోజులలో మాత్రమే దీపారాధన చేస్తాను. 

ఈ సోషల్ మీడియా లో కొందరు వీడియో లు తమకి  కావలసినంత మేరకి  కత్తిరించి పంచుతున్నారు. ఈ రెండు నిమిషాల వీడియో లు చూసి ఆయన ఎందుకు చెప్తున్నారో దేనికి చెప్తున్నారో అర్ధం కాదు మొట్ట మొదట చూసిన వారికి.  42  రోజుల  రామాయణం, 35 భాగాల భారతం  విన్న నేనే,  పైన చెప్పిన అమ్మాయి లాగా ఒక్క రోజు ఆలోచించలేదు. ఈ రెండు నిమిషాల వీడియో చూసిన వారికి ఇక ఏ  అవగాహన వస్తుంది ఆయన ఏమి చెప్తున్నారో ?

చాగంటి వారు ప్రవచనం అనేది అందరికీ  ఒకటే చెప్తారు. ఇన్ని వేలమంది వింటూ ఉంటే, ప్రతి ఒక్కరికీ customize చేసి చెప్పలేరు కదా. మనకి ఏది కావాలో అది మనమే గ్రహించుకోవాలి!!  పైన చెప్పిన అమ్మాయి లాగా సమాజ సేవ చేయకపోయినా పరవాలేదు  కానీ  ఆయన చెప్పేది సమాజహితవు కోసమే అని అన్న ఒక్క విషయం గ్రహించగలితే  చాలు!!

రామాయణం – ఒక అద్భుత కావ్యం

అందరికీ  శ్రీరామనవమి శుభాకాంక్షలు !! ఈ రోజు పొద్దున్నే శ్రీరామనవమి శుభాకాంక్షలు చెబుతూ whatsapp లో ఒక  అద్భుతమైన సందేశం వచ్చింది.  దాని సారంశం ఇది:  రాజ్యాల కోసం పోరాడిన రాజుల చరిత్రలు  కాలగర్భం తో పాటు  కలిసిపోయాయి.  తండ్రి కి ఇచ్చిన మాట కై రాజ్యం అక్కరలేదని అడవులకి వెళ్ళిన శ్రీరామచంద్రుడు చక్రవర్తి లా మన హృదయా లలో నిలిచి రాజారాముడు అయ్యాడు.  రామాయణాన్ని అర్ధం చేసుకునే రీతి లో అర్ధం చేసుకుంటే ఈ విధం గానే ఆలోచిస్తాము.

చిన్నపుడు రాజాజీ మెచ్చిన రామాయణం  చదివాను.  కొన్ని చలన చిత్రాలు చూసాను. చందమామ లో ధారావాహిక గా చదివాను.   తరవాత టీవీ లో ధారావాహిక గా చూసాను.  MS రామారావు గారు గానం చేసిన సుందరకాండ విన్నాను. మా అమ్మాయి HSS వారి పోటీ ‘కౌన్ బనేగా రామాయణ్  ఎక్స్ పెర్ట్ ? ‘ లో పాల్గొన్నపుడు తనతో పాటు  చదివాను.  ఇన్ని చదివినా  కొన్ని ప్రశ్న లు మదిలో మెదులుతూ ఉండేవి. ఏమిటి  రామాయణం గొప్పదనం అని.   రాముడు ఒక రాజు అంతే కదా, ఎందుకు దేవుడు అయ్యాడు అని. రాముడు కి ఇంత మంది భక్తులు ఏంటి అని. తులసీదాసు, త్యాగరాజు, మొల్ల, భద్రాచల రామదాసు, గాంధీజీ, చలన చిత్ర దర్శకులు బాపు… ఇలా చెప్పుకుంటే పోతే బోలెడు మంది. రామకోటి ఎందుకు వ్రాయటం అని ఇలా చాలా ప్రశ్నలు ….. .

నాకు ఏదైనా పని చేసుకున్తున్నపుడు ఏ  పాటలో  వింటూ చేసుకోవడం పని  చేసుకోవడం అలవాటు. అలా పోయిన ఏడాది ఒక రోజు అనుకోకుండా, గురువు గారు   చాగంటి వారి ప్రవచనం రామాయణం లోని గంగావతరణ ఘట్టం విన్నాను. ఎంత అధ్బుతం  గా చెప్పారంటే మాటల్లో చెప్పలేను!!  వారికి నా వందనములు!!  ఇక అది మొదలుకొని  ఆ  యు ట్యూబ్ లింక్ లోనే  ‘Sri Sampoorna Ramayanam Day1’ నుంచి మొదలు పెట్టి, 42 రోజులు పూర్తిగా విన్నాను. నలభై రెండు భాగాలూ వినడానికి  దాదాపు ఒక ఏడాది పట్టింది నాకు.  నాతో పాటే మధ్య మధ్య లో మా పిల్లలు కూడా ఓ చెవి పడేసేవారు. అంత అధ్బుతమైన ప్రవచనం విన్నాక రామాయణం విశిష్టత ఏంటో అర్ధం అయింది.  నాకు వచ్చే ఎన్నోప్రశ్నలకి సమాధానం తెలిసింది. నా ఆలోచనా ధోరణి చాలా మారిందనే చెప్పాలి. ఇప్పుడు నాకు రామదాసు కీర్తన అయినా,  త్యాగరాజు కీర్తన అయినా  వింటుంటే వారు రాముడిని ఎంత బాగా అర్ధం చేసుకున్నారో అర్ధం అయింది.

గురువు గారు  చాగంటి వారు  చెప్పినట్లు,  మన రోజూవారి జీవితం లో  రామాయణం పాత్రలు కన్పిస్తూనే ఉంటాయి. నేను రామాయణం గురించి మాట్లాడేంతటి దాన్ని కాదు కానీ,  నాకు నేను  అన్వయించుకున్న రెండు ఉదాహరణలు చెప్తాను.

ఒకటి:

సుందరకాండ లో హనుమ అతి సుందరమైన లంక ని చూస్తారు. ఆయన  ఒక కోతి, అందునా  బ్రహ్మచారి. మనసు ఎంత చంచలం గా ఉండాలి అటువంటి లంక ని చూస్తే ?  అయినా  తను చేయవలసిన పనిమీద దృష్టి  మీదే మనసు నిమగ్నం చేసారు. అందుకే సుందరకాండ అంత గొప్ప కాండ  అయింది.  చీటికి మాటికి  ముఖ పుస్తకం, whatsapp చూసే మనం ప్రతి రోజు హనుమ ని గుర్తు చేసుకోవాల్సిన అవసరం ఎంతో  ఉంది.

రెండు:

నేను పద్మశ్రీ పురస్కారం గ్రహీత ,ప్రముఖ  సామాజిక కార్యకర్త సునితా కృష్ణన్  గారు ముఖపుస్తం అనుసరిస్తూ ఉంటాను. ‘స్వరక్ష’ అనే ప్రచార కార్యక్రమం(campaign)  చేస్తున్నారు. ఆ కార్యక్రమం లో భాగం గా ఒక వీడియో చూసాను. ఒక కార్యకర్త , అలా నిర్భంధమైన అమ్మాయిలు ఎన్ని బాధలకి గురి అవుతారో చెప్పి, వారు ఎవరినీ నమ్మలేనిస్థితి కి ఎలా చేరుకుంటారో చెప్తున్నాడు. నాకు వెంటనే గుర్తుకు వచ్చిన సన్నివేశం  సుందరాకాండ లో హనుమ సీతా దేవిని నమ్మించడానికి చేసిన ప్రయత్నం. లంక లో ఆ చెట్టు క్రింద అన్ని నెలల పాటు  అదే చిరిగిన చీర తో, తిండి లేకుండా ,రోజు రాముడిని తిట్టి పోసే రావణుడు, రాక్షస స్త్రీ ల మధ్య  ఒంటరి పోరాటం చేసిన సీత కి,  ఈ రోజున ఇలా చిక్కుకున్న  అమ్మాయిలకీ తేడా ఏమన్నా ఉందా అన్పించింది.  ఆ రోజున హనుమంతుడు ఎంత కష్టపడ్డారో  సీత నమ్మించేందుకు, ఈ రోజు ఇలాంటి rescue  operations చేసే వారు అంతే కష్టపడ్తున్నారు అన్పించింది.  అక్కడ చిక్కుకున్నఅమ్మాయిలు  కూడా ఏదో మాయలేడి ని చూసి మోసపోయే వారే  కదా!!అమ్మాయిలని అటువంటి చోట్లకి చేర్చి ఆనందించే వారలకీ  రామాయణం లోని శూర్పణఖ పాత్ర కి తేడా ఏమన్నా ఉందా?  

సుందరాకాండ లో సీత తనని తాను హనుమంతునికి పరిచయం చేసుకుంటూ ‘పరిణయమయిన పన్నెండు ఏళ్ళు  అనుభవించితిని భోగ భాగ్యములు’ అంటుంది. ఎంత గొప్ప మాట !! ‘మొగడు మెచ్చిన తాన కాపురం లోన మొగలి పూలా  గాలి ముత్యాల వాన’  అన్న పాట  గుర్తొస్తోందా ?

ఒక్క మాట లో చెప్పాలంటే  – రామాయణం మన రోజూవారి జీవితం లో ఒత్తిడి తగ్గించే మాత్ర !!రామాయణాన్ని చదువుదాం చదివిద్దాం !!  ఎలా ఉండాలో నేర్చుకుందాం !!