09/11/2001

ఆ పేర్లు చదువుతూనే……………………………………………………………..ఉన్నారు పొద్దున్నుంచీ. 🙏🙏🙏.


సెప్టెంబర్ 11, 2001 అమెరికా చరిత్ర మర్చిపోలేని రోజు. గడిచి 20 ఏళ్లయినా ఆ రోజు పొద్దుటే వార్తలు చూసిన నా లాంటి వారికి నిన్న జరిగినట్లే అనిపిస్తుంది.


మా అమ్మాయిలు బళ్ళో వ్యాసం కోసం రెండు మూడు సార్లు మమ్మల్ని ఇంటర్వ్యూ చేసారు ఆ రోజు జ్ఞాపకాలని తమతో పంచుకొమ్మని. అదే క్లుప్తంగా కొన్ని మాటల్లో. ..


మా వారు ఉద్యోగ రీత్యా ఇంకో ఊర్లో ఉండేవారు. ఒక్కోసారి తను 3 వారాలపాటు అక్కడే ఉండిపోవాల్సి వచ్చేది. సరే నేను కూడా ఇక్కడే ఉండి ఏం చేయాలి అని తనతో వెళ్తూ ఉండేదాన్ని. ఎప్పుడూ drive చేసేవాళ్ళము. ఆ వారం విమానంలో వెళదాం అని ఆదివారం నాడు బయలుదేరి విమానంలో వెళ్ళాము. ఓ హోటల్లో చిన్న స్టూడియో room లో ఉండేవారం. మంగళవారం సెప్టెంబర్ 11, 2001. ఎప్పటిలాగే తను ఆఫీస్ కి వెళ్ళి పోయారు. వెళ్లిన కాసేపటికే తనే ఫోన్ చేసి చెప్పారు ‘ వార్తలు చూడు ఏదో flight accident అంటున్నారు ‘ అని. టీవీ పెట్టిన వెంటనే అసలు ఒక దాని వెంట వార్తలు. ఇక్కడో విమానం, అక్కడో విమానం అంటూ. చూస్తుండగానే రెండు భవనాలు కుప్పకూలిపోయాయి. వణుకు పుట్టింది. ఏమవుతోంది అమెరికాలో ? నెమ్మదిగా అర్ధమయ్యింది ఏంటంటే ఒక విమానం Pentagon ని కూడా కొట్టింది అని. వర్జీనియా స్నేహితులకి ఫోన్లు చేసి క్షేమసమాచారాలు అడిగాను.


మా వారు నేను వార్తలు చూసి బెంబేలెత్తి పోయాను అని పొద్దున్నించీ రూములోనే ఉన్నాను అని కాస్త బయటికి వెళితే బావుంటుందని పక్కనే ఉండే grocery దాకా వెళ్ళాము. అన్నీ నిర్మానుష్యం. అటువంటి భీకర వాతావరణం అమెరికాలో ఎప్పుడూ, ఎప్పుడూ చూడలేదు నేను . .


ఆ తరువాత , మేము రెండు రోజుల క్రితం వచ్చిన విమానాశ్రయం నుండే fight 77 వెళ్ళింది అని తెలిసినపుడు చాలా భయం వేసింది. విమానం పడిపోతున్నట్లు, దూసుకొస్తున్నట్లు పీడకలలు కొన్ని నెలల వరకూ వెంబడించాయి నన్ను. పైగా నేను గర్భిణీని కూడా . కొన్ని సార్లు కొన్ని flight నంబర్లు చూసి భయం వేసేది. ఈ రోజుల్లో లాగా ఎప్పుడు పడితే అప్పుడు ఫోన్లు చేసి ఆ anxiety పంచుకోవడానికి వసతి కూడా ఉండేది కాదు. చేస్తే వందల డాలర్ల బిల్లు మరి.


ఈ రోజుకి ఆ airport వెళ్ళినపుడు తలచుకుంటే భయము & బాధ రెండూ కలుగుతాయి. ఆ ఉగ్రవాదులు మా చుట్టుపక్కలే మాములు మనుష్యులుగా తిరిగారు అంటే మన చుట్టూ ఎటువంటి మనుష్యులు ఉన్నారో కదా అని బాధేస్తుంది కూడా. fight 77లో మూడేళ్ళ చిన్నారి కూడా ఉంది. ఏ పాపం చేసిందని ఆ చిన్న జీవితాన్ని బలి చేసారు అనిపిస్తుంది.
చరిత్రలో ఆ రోజుని ఎప్పటికీ మరచిపోదు అమెరికా.


ఆ రోజున ప్రాణాలు కోల్పోయిన అమరవీరులకు, అందరి ప్రాణాలు కాపాడుతూ తమ ప్రాణాలనే అర్పించిన అగ్నిమాపక దళ సిబ్బంది, పోలీస్ అమరవీరులకి నా శ్రద్ధాంజలి🙏🙏🙏.


Photo Source: Washington Post live today

ఆకాశాత్పతితం తోయం యథాగచ్ఛతి సాగరం

DISMANTLING GLOBAL HINDUTVA  Conference జరుగుతోందా ? జరుగుతోందనే చెబుతోంది website .  అందరికి  Freedom of  Speech  ఉన్నది కదా.  అది గౌరవించవలసిందే. 

దాదాపు 9 లక్షల emails  HAF వారి నుంచీ,  3 లక్షల emails CoHNA వారి నుంచీ ఈ విశ్వవిద్యాలయాలకు వెళ్ళాయి  అని ఆయా సంస్థలు చెప్పారు.   కొన్ని విశ్వవిద్యాలయాలు  మేము విరమించుకుంటున్నాము  అని చెప్పాయి. కొంత వరకూ విజయమే. కానీ Conference వారు  ఇప్పుడు తామేదో  బాధితులం అన్నట్లు  ఆ  narrative  ని నిర్మించుకునే ప్రయత్నంలో ఉన్నారు. 

అసలు వీరి బాధ ఏమిటో  ఒకసారి చూద్దాం. 👇👇

సెప్టెంబర్ 11 వస్తోంది.  2001 లో పుట్టిన వారికి  20 ఏళ్ళు నిండుతాయి. కానీ  ఆ పిల్లలు తమ milestone  పుట్టినరోజున  అంత ఆనందంగా ఏమీ ఉండరు. ఎందుకంటే  తమతో పాటు పుట్టిన పిల్లలలో  కొంతమందికి తమ తల్లినో తండ్రినో చూసుకునే ప్రాప్తం లేని రోజు.   ఆ రోజు పొద్దున్నే టీవీలో  వార్తలు చూసిన  వారికి  పీడ కలలు  ఇచ్చిన రోజు.  అమెరికా అంతా చాలా దుఃఖపడిన రోజు . అమెరికా చరిత్ర మర్చిపోలేని రోజు. 

అందుకని కొంత మంది మేధావి వర్గాలు ఆ రోజుని హిందువులని ‘ఉగ్రవాదులు’ గా బూచిలా చూపించడానికి చేస్తున్న గట్టి ప్రయత్నమే ఈ DISMANTLING GLOBAL HINDUTVA  Conference. 

ఎందుకు వీరి మాటలని ఖండించాలి? 👇👇

ప్రపంచమంతా యూదులని ఎన్నో యాతనలు  పెడితే  ఒకే ఒక్క దేశం స్వాగతించింది.  అదే భారత దేశం.  ఎందుకు ? భారత  దేశం పాటిస్తున్న సనాతన ధర్మమే  మూల కారణం !! పాలలో చక్కెర లా  కలిసి పోతామన్న పారశీయులని ఆనాటి  నుండీ ఈనాటి వరకు గౌరవించే సంస్కృతి.   

పరిస్థుతుల ప్రభావం వలన అదే  భారతీయలు ఇంకో దేశానికీ వలస వచ్చినా, అదే విధంగా పాలలో చక్కెర లా  కలిసిపోతారు.  ఏ దేశమేగినా  ఏ రంగంలో అయినా తమ ప్రతిభతో  రాణిస్తూ ‘Indian Origin’ అనిపించుకుంటూ, అమెరికా దేశ  అధ్యక్షుల వారి లాంటి వారితోనే ‘భేష్’ అనిపించుకుంటున్నారు. ఎటువంటి వారికైనా ఆకలితో ఉన్నపుడు అన్నం పెట్టమని చెప్పింది ఈ హిందూ ధర్మం.  Steve  Jobs  గారు  వారానికి ఒకసారైనా మంచి భోజనం లభిస్తుందని ఇస్కాన్ వారి భోజనం తినేందుకు 7 మైళ్ళు నడచుకుంటూ వెళ్ళేవాడిని అని 2005 లో Stanford  విశ్వవిద్యాలయం వారి స్నాతకోత్సవంలో చెప్పారు. అటువంటిది ధర్మం ఈ హిందూ ధర్మం.  అటువంటి  జాతి మీద  Caste’ అన్న పోర్చుగీస్ మాట చెప్పి విడగొట్టాలని విశ్వప్రయత్నాలు జరుగుతూనే ఉన్నాయి. ప్రపంచంలో  ఏసుక్రీస్తుల వారు చెప్పిన సువార్త తెలియని జాతి ఇదొక్కటే,  వీరికి  సువార్తని తెలియజేసి మతమార్పిడి చేయమని ‘Joshua Project’ వారు వారి website లో స్పష్టంగా ఒక వీడియోలో వెల్లడించారు. ప్రయత్నాలన్నీ సరిగ్గా ఫలించడం లేదేమో మరి.   DISMANTLING GLOBAL HINDUTVA  Conference అంటూ ఒక  మేధావి వర్గం హిందూ ధర్మం పాటించేవారిని  ఏకంగా  ‘ఉగ్రవాదులు’ అనే ముద్ర వేయాలని చేసే నీచమైన ప్రయత్నం.  ‘వసుదైక కుటుంబకం’  అని ప్రపంచమంతటిని  తన కుటుంబం  అనుకునే జాతినే  ఈ విధంగా చిత్రీకరిస్తున్నారు అంటే ఇంతకంటే దారుణం లేనే లేదు.    

అందుకే ఈ వర్గం వారి మాటలను ప్రపంచంలో  ఎక్కడ ఉన్నా  సరే  ప్రతీ హిందువూ తప్పక ఖండించాలి అంటాను నేను. 

భారతీయ పౌరసత్వం ఉన్నవారు  భారత  ప్రభుత్వం లో Ministry of External Affairs & Ministry of Culture కీ తెలియజేయండి. 

ఎందుకు ? 👇👇

1)ఎంతో మంది భారతీయ విద్యార్థులు అమెరికాలో విశ్వవిదాయాలయాల్లో  చదువుకోడానికి వస్తారు. ఇటువంటి కాన్ఫరెన్స్ వారిలో భయాందోళనలు కలిగిస్తుంది. వారి క్షేమసమాచారాలని(safety)  దృష్టిలో పెట్టుకుని  Ministry of External Affairs కూడా స్పందించాలి.  

2) ఈ conference  లో ప్రసంగిస్తున్న ఒక వక్త  రాముడి మీద దారుణమైన పద్యం వ్రాసింది. రాముడు అంటే ప్రతి హిందువు కొలిచే  ధర్మమూర్తి.  అయోధ్య గుడి నిర్మాణం అనగానే ప్రపంచ నలుమూలల నుంచీ విరాళాలు ఇచ్చారు.  అంటే హిందూ సంస్కృతి  అంటే భారతదేశమే గా  represent  చేస్తున్నది ? అటువంటి సంస్కృతిని కాపాడవలసిన వారు Ministry of Culture, India.  రాజీవ్ మల్హోత్రా గారు చెప్పినట్లు   Ministry of Culture కూడా ఈ విషయంలో కలగజేసుకోవాలి. 

హిందువులు, ముఖ్యంగా అమెరికాలో వారు,  👇👇

ఆ రోజు తప్పక చేయాల్సిన పని ఏంటంటే సెప్టెంబర్ 11, 2001 తో బాటు సెప్టెంబర్ 11, 1893 కూడా తప్పక తలచుకోండి. .  దాదాపు  130ఏళ్ళ  క్రితం ‘అమెరికా సోదరులు, సోదరీమణులారా’ అంటూ  మొదలు  పెట్టీ పెట్టగానే కరతాళ ధ్వనులతో మారుమ్రోగింప చేసిన  స్వామి వివేకానందుల వారి ప్రసంగం మీ పిల్లలతో చదివించండి. వీలైతే బట్టీయం  వేయించండి.  తప్పులేదు.   మీ గోడ మీద ఆ ప్రసంగాన్ని పోస్ట్ చేయండి.  ప్రపంచమంతా గుర్తు పెట్టుకునేలా చేయవలసిన బాధ్యత మనదే. . 

ఇది ఎక్కడో  ఏదో  జరుగుతోంది మనకెందుకులే అనుకోవద్దు.  హిందూ సంస్కృతి పైన జరుగుతున్న దాడి.  దీనిని ఏ దూషణ లేకుండా  గౌరవప్రదమైన రీతిలో ఖండించి & ప్రపంచానికి  చెప్పవలసిన  బాధ్యత ‘నేను హిందువు’ ని అనుకునే ప్రతీ ఒక్కరి మీదా ఉన్నది. 

ఈ చాదస్తం ఉండాల్సిందే

శ్రావణ మాసం మూడో శుక్రవారం నాడు వరలక్ష్మీ వ్రతం చేసుకున్నాను. ఈ పండగ ఎండాకాలం సెలవల్లో రావటం వలనో ఏమో మా పిల్లలకి బాగా తెలుసు ఏమి చేస్తానో. వాళ్ళే నాకు తోరం కట్టేవారు కూడా. మొన్న వ్రతానికి ముందర రోజు రాత్రి పడుకునేటప్పుడు మా పెద్ద పిల్ల వచ్చి ‘ రేపు నాకేమి పెద్ద పని లేదు. నీకొచ్చి సహాయం చేయనా ‘ అంటే , ‘ఏమొద్దులే. శ్రీ సూక్తం & మంత్రపుష్పం చదువు ఆ టైం కి వచ్చి’ అన్నాను. ‘ఓ అదెంత పని ‘ అన్నట్టు చెప్పింది. పొద్దున్న లేచి 5 రకాల వంటలు చేసి , అమ్మ వారిని తయారు చేసి 9:30 కల్లా కూర్చున్నాను. అబ్బో మా ఇంటి మా మాలచ్చి వచ్చేస్తుంది , శ్రీ సూక్తం చెప్పేస్తుంది అనుకున్నా. కథ చదివి హారతి సమయానికి గంట వినిపించి మావారు మాత్రం వచ్చారు. ఆయన ఆశీర్వచనం తీసుకుని, ప్రసాదం తిని మీటింగు కి వెళ్ళిపోయా. అది ముగించి ఇక భోజనానికి వచ్చేసరికి భోజనం చేయడానికి పిల్ల సిద్ధంగా ఉంది. ‘అదేంటే రాలేదు పూజకి’ అంటే, ‘వచ్చాను. దండం పెట్టుకుని చెప్పాను . ప్రసాదం అనుకున్నది తీసుకుని తిన్నాను’ అంది. తోరం కట్టాను. కట్టించుకుంది.

ఇదంతా చదవగానే ‘అమ్మో అమెరికా పిల్ల . ఆ మాత్రం చేస్తే కూడా తల్లి ఆక్షేపిస్తోంది’ అనిపిస్తోంది కదా. మీకు ఎందుకలా అనిపిస్తోంది ఒకసారి ఆలోచించుకోండి.

మా పిల్లలు దాదాపు 2ఏళ్ళ వయసు నుంచీ నిద్ర లేవగానే స్నానం చేసి దేవుడికి నమస్కారం చేసుకోకుండా వంటింట్లోకి వచ్చేవారు కాదు. బోలెడు శ్లోకాలు, వాటికీ అర్ధాలు చెప్పేవారు. బాలవికాస్ కి వెళ్ళడం ఒకటి కావచ్చు. మేము నేర్పించింది కావచ్చు. ఈరోజుకి కూడా చాలా మటుకు అలాగే ఉంటారు . కానీ కొన్ని కొన్ని మానేశారు. అడ్డాల నాడు బిడ్డలు కానీ గడ్డాలా నాడు కాదు కదా 🙂 ఇక్కడ పుట్టి పెరిగిన భారతీయ పిల్లలకి తమకి తాము ఎక్కడ వారో , తమ ఉనికి ఏంటో చాలా అయోమయం గందరగోళం ఉంటుంది. మా అదృష్టం ఏంటంటే బాలవికాస్ లో గురువులు రావు గారి గురించి మాకు తెలియడం మా పిల్లలు ఆ తరగతులకు వెళ్లడం జరిగింది. బాలవికాస్ అనేది ఏ సంస్థకి చెందినది కాదు. ఆయన వారి పిల్లలతో జరిగిన కొన్ని experiences వలన 32 ఏళ్ళ క్రితం ఈ సంస్థ ( సంస్థ అనటానికి కూడా నేను ఇష్టపడను. కుటుంబం అంటాను) ప్రారంభించడం జరిగింది. శ్లోకాలు , వాటి అర్థాలు , Homeless shelter ల లో సేవ, ఇక్కడి వారితో మన ఉనికి కోల్పోకుండా ఎలా కలిసిపోవడం, interfaith లు ఇలా ఎన్నో చెప్తారు. ఆ తరగతికి వెళ్లిన పిల్లలలో తమ ఉనికి ఏంటో తెలుసుకునేలా ఓ విత్తనం నాటారు.

ఈ విత్తనం అనేది ఎంత బలంగానే ఉన్నా , దాని వలన చెట్టుకి చీడ పట్టడం లేదేమో కానీ ఆశించినంత ఫలాన్ని ఇవ్వటం లేదు. ఈ సోషల్ మీడియా తాకిడికి, చుట్టుపక్కల వారి వైఖరికి తట్టుకోలేకపోతోందా అనిపిస్తోంది ఒక్కోసారి.

అమెరికాలో చాలా మంది భారతీయులకి తమ తోటి తల్లితండ్రులు అంటే, పిల్లల్నిరోట్లో వేసి రుబ్బి ivy league కాలేజీల్లో డాక్టర్లు గా, ఇంజనీర్లుగా తయారు చేసేస్తారు ( చేయడానికి రెడీ గా ఉన్నా వాళ్ళే కదా చదవాల్సింది) అని ఒక అపోహ. స్పెల్లింగ్ బీలు ఏ పోటీ తీసుకున్నాఈ పిల్లలే గెలుస్తారు, ఆ తల్లితండ్రులు అలా తయారు చేస్తారు అని బళ్ళలో టీచర్ల కి కొంచెం చిరాగ్గానే ఉంటుంది. అలాంటి తల్లితండ్రులు లేరా అంటే ఉన్నారు. కానీ overall picture చూస్తే పిల్లల కోసం అన్నీ త్యాగం చేసి నోరు కట్టుకుని కాలేజీ చదివించే వారిలో భారతీయ తల్లితండ్రులు ముందు ఉంటారు. ఎక్కడ school district బావుంది అంటే అక్కడ ఇల్లు కొనుక్కోలేకపోతే అద్దెకి తీసుకుని చదివిస్తారు. పిల్లలకి ఏదన్నా activity ఉంటే పార్టీలకి వెళ్ళరు. ఎక్కువ నేరాలు అనేవి కూడా ఈ community లో చూడం. చెప్పాలి అంటే ఒక ఆదర్శపూరితమైన జీవితం గడిపే జాతి. కానీ వీరిలో ఉండే positive side అంతా పక్కన పడేసి అమెరికాలో వచ్చే ఈ famous comedy show లు చాలా మటుకు భారత్ నుండి వచ్చిన తల్లితండ్రులని హేళన చేస్తున్నాయా అన్న అనుమానం వస్తోంది. tiktok లో Indian accent పెట్టి రకరకాల వీడియోలు. lilly singh, hasan minaj , never have i ever , match making అన్నిటిలో భారత దేశ సంస్కృతిని, తల్లితండ్రులని ఏదో నవ్వులాట గానో, చాదస్తం గానో చూపిస్తున్నారు అని చాలా బలంగా అనిపిస్తోంది. Stereotyping అనరా దీనిని? ఈ రోజు lilly singh వీడియో ఒకటి చూసాను. అమ్మ, నాన్న ఇల్లు clean చేస్తుంటే నాన్న కి నడుము పట్టేస్తే దాని మీద దరిద్రమైన కామెడీ చేసింది ఆ పిల్ల.

దీని ప్రభావం ఎంతలా ఉంటుంది అంటే మనం చేసే పనుల మీద మనకే నమ్మకం ఉండదు. లేదా పిల్లలకే మన పని మీద నమ్మకం ఉండదు. అభిప్రాయాలు మారతాయి. ఒక తాటి మీద ఉండటం జరగదు. చిన్న విషయాలలో పెద్దగా కనిపించదు. అదే పెళ్ళి లాంటి పెద్ద విషయానికి వచ్చేసరికి ఒక అఘాతం ఏర్పడచ్చు కూడా.

ఒక చిన్న ఉదాహరణ చెప్తాను. ఒకసారి బాలవికాస్ లో రామకోటి వ్రాసినందుకు రాముడి ఫోటో కానుకగా ఇచ్చారు మా అమ్మాయికి. అది వచ్చి మురిసిపోతూ చూపిస్తుంటే ఎవరో ‘ ఏమిటీ మరీ మీ చాదస్తం. పిల్లలకి రామకోటి ఎందుకు ‘ అన్నారు. ఆ క్షణంలో నాకు కూడా ఏమిటిలా చేసాను అనిపించింది. కానీ ఇన్నేళ్ళ తరువాత తన స్నేహితురాలికోసం ప్రార్థన చేయాలి అంటే నేను ఏమీ చెప్పకుండానే వ్రాసింది. తెలిసి తెలియని ఎవరో అన్న మాట నాలో ఒక సందిగ్థత వచ్చేలా చేసింది. నా సంస్కృతి ఒక చాదస్తం అన్నట్టు చేసింది. ఇతర సంస్కృతుల వారు నాటిన మనలో పేరుకుపోయి, గడ్డ కట్టేసిన ఆత్మనూన్యతా భావం విత్తనం. .

‘చాదస్తం ఎందుకు. light తీస్కోండి’

‘ మీరు అలా ఉంటారు కాబట్టే మీ పిల్లలు అలా తయారయ్యారు’ ఇటువంటి మాటలు మాట్లాడకండి. మీరు ‘చాదస్తాలు ‘ follow అవ్వకపోయినా పరవాలేదు. follow అయ్యేవారిని , వింటున్న తరవాతి తరాన్ని వేలెత్తి చూపకండి. వేరే సంస్కృతులు చూడండి . ముఖ్యంగా యూదులని. ఏమి చేసినా గర్వంగా చెప్పుకుంటారు.

మా పిల్లలకి చిన్నపుడు శ్రీ సూక్తం చెప్పించింది ఎందుకు అంటే ముందు ముందు తప్పక పాటించి ఇంకో రెండు తరాలకి చెప్తారని ఆశతో . అంతే కానీ మధ్యలో ఆపేస్తారని కాదు. అంత expectation ఎందుకు అనుకోవచ్చు. ఇంత వివరంగా పుట్టుపూర్వోత్తరాల గురించి విలువలు ఇన్నేళ్లు కస్టపడి చెప్పిస్తే నాకు నచ్చినపుడే చేస్తా అంటే ఎలా ? ఇలాంటి వాళ్ళ పరిస్థితి ఇలా ఉంటే ఏమీ తెలియని వాళ్ళ పరిస్థితి ఏంటి? ఏ DISMANTLING GLOBAL HINDUTVA లాంటివి ఎందుకు ఖండించాలో అర్ధం కాదు. కాలేజీల్లో వారి గురువులు ‘మీరు ఉగ్రవాదులు. మీ పూర్వికులు ఉగ్రవాదం చేసారు’ అంటే అవునేమో అనుకుంటారు కూడా. తరువాత ‘చరిత్ర’ వీళ్ళని పక్కన పడేసి ఇంకో మలుపు తీసుకుంటుంది.

అమెరికా నుంచి అనకాపల్లె దాకా అంతా ఒక్క తానులో ముక్కలేనా

హిందూ ధర్మంలో అందరు దేవుళ్ళు ఒక్కటే. అందుకే ‘క్రైస్తవం తీసుకుంటే తప్పేంటి . ఏ దేవుడైతే ఏమిటి. అందరూ ఒక్కటే’ అనే ధోరణిలోనే ఉంటారు భారత దేశంలో హిందువులు. ఆ విధంగా అనుకుని క్రైస్తవంకి మారతారు. క్రైస్తవం తీసుకున్నాక హిందువుల ప్రసాదాలు తినటం మానేస్తారు. దేవుడి పటాలు పడేయటం. స్త్రీలు బొట్టు, మంగళ సూత్రాలు తీసేయడం. ఎలా మొదలవుతుంది అంటే → ఒక నిజ దేవుడిని పూజించడం అనే ఒక నమ్మకం అనే సూత్రంతో మొదలయి సంస్కృతి లోని కట్టు, బొట్టు మార్చేదాకా వెళ్తుంది. ఆ తరువాత కట్టు, బొట్టు మార్చాక అంతకుముందు తమ పూర్వికులు పూజించిన దేవుళ్ళు ఒక రాక్షస దేవుళ్ళలాగా కనిపిస్తారు వీళ్ళకి. సొంత వారు ఇక శత్రువులుగా తయారవడం మొదలవుతుంది. ‘నీ దేవుడు నిజ దేవుడు కాదు. నా దేవుడే నిజ దేవుడు ‘ అని వాదన. ‘అయ్యా కుటుంబాలలో గొడవలు మొదలయ్యాయి. మీరు ప్రచారం ఆపండి’ అంటే క్రైస్తవులు ‘మమ్మల్ని దేవుడు ప్రచారం చేయమని చెప్పాడు. మాకు రాజ్యాంగ హక్కుంది’ అంటారు. చివరకి జరిగేది ఏంటి ? ఇలా కుటుంబాల్లోననే గొడవలు ఉంటే దేశంలో Integrity అనేది తప్పకుండా దెబ్బతింటుంది. ఇది తాను ముక్కలో ఓ భాగం.

Leftists/ liberals/ Intellectuals భారత దేశంలో వేరే మతాన్ని దూషించకుండా హిందూ మతాన్నే దూషిస్తున్నారు అని మాములు వాళ్ళకి కూడా అర్ధమయింది. వీళ్ళు ఏమంటారో చూద్దాం. రాముడిని పూజించేవారు ఆర్యులు. ఎక్కడినుంచో వచ్చారు. రాముడు ఆర్యుడు. ఆదివాసీ ద్రవిడుడు అయిన రావణాసురుడిని చంపాడు. ఈ ఆర్యులు దళితులపై చాలా కుల వివక్ష చూపారు. దళితులుదే ఈ భారత భూమి. కాబట్టి ఈ ఆర్యుల్ని వెళ్ళగొట్టాలి. రాముడు భార్యని వెళ్ళగొట్టాడు, అగ్ని ప్రవేశం చేయించాడు. కృష్ణుడు 16 వేలమందిని పెళ్ళాడాడు . అంటే ఆర్యులకు స్త్రీ వివక్ష చాలా ఉంది. ‘ వీరికున్నంత క్రూరత్వం ప్రపంచంలో ఎవరికీ లేదు చూసారా?’ అని చెప్తారు. కుల వివక్ష , స్త్రీ వివక్ష గురించి మాట్లాడే ‘లిబరల్’ గా మాట్లాడే వీరు బైబిల్ లో ఉన్న బానిసత్వం గురించి , స్త్రీకి ఎంత స్వేచ్ఛ ఇచ్చారో ఏ మాత్రం చెప్పరు . మాట్లాడరు. ఇది తాను ముక్కలో ఇంకొక భాగం.

సోషల్ మీడియా పుణ్యమా అని ఈ హిందువులు ప్రశ్నించడం మొదలు పెట్టేసరికి ఈ వ్యవహారం అంతా ఇంకో మలుపు తీసుకుంటోంది. ఏమిటి అంటే RSS అనే సంస్థ ఉగ్రవాదం . హిందువులు వేరు. హిందుత్వ వేరు. ఇది కూడా కొంచం పాత పాటే అనుకున్నా, ఈ పాట పల్లవి ఆఫ్గనిస్తాన్ లో తాలిబన్లతో సమానం అంటూ ట్విట్టర్ లో ఎక్కువయింది. చరణం అమెరికాలోని విశ్వవిద్యాలయాల్లో DISMANTLING GLOBAL HINDUTVA అంటూ మొదలయింది. ఈ లోపల Audrey Truschke గారికి ‘Indus Valley civilization’ మీద చరిత్ర వ్రాయమని ఆవిడకి ఫండింగ్ వచ్చింది. అదొక రాగం పెట్టారు పాటలో. దీనిని బట్టి ఇంకో చరణం కూడా వచ్చేసింది. నిన్న రక్షణ టీవీ లో కూడా తాలిబన్ పల్లవి పాడి కొత్త చరణం పాడాడు ఒకాయన. ఏంటంటే ఆది శంకరాచార్యుడు AD 788 లో హిందూ మతం తెచ్చారట, అప్పటికే భారత్ లో క్రైస్తవం, ఇస్లాము ఉన్నాయట. శంకరాచార్యుల వారు వాదనలు చేసి బౌద్ధులందరినీ చంపేశారుట . ‘Indus Valley civilization’ మీద ఆయన ఎవరితో అయినా వాదించ గలరట . ఇప్పుడు తానులో ముక్కలు కలపండి. ఇంకా ఈ పాట చరణాలు ఎన్ని ఉన్నాయో ఏంటో ?

ఎవరి ధర్మం వారు పాటించుకుంటే ఏ దిగులు లేదు. ఇలా హిందువులని & వారి ఆచారాల్ని ప్రపంచ వ్యాప్తంగా అనేక విధాలుగా విమర్శిస్తూ ఉంటే ప్రశ్నించకుండా ఎలా ఉంటాం?అసలు తమ మానాన తాము బ్రతికే హిందువులు ప్రపంచంలో ఎవరిని బాధ పెట్టారు? ప్రపంచంలో ఏ మతంలో కూడా విభజన లేనట్లు హిందూ మతం లో కులాలు ఉన్నాయి అంటూ అదొక పెద్ద బూచిగా చూపిస్తూ దాని ఉనికినే లేకుండా చేద్దామని వీరు చేయని ప్రయత్నం లేదు. ఇప్పుడు ఒక హిందూ ధర్మం అంటేనే ఉగ్రవాదం అంటే ఏమి చేయాలి ?

ఇది చదవండి. ఆడ్రీ గారి మావగారు విశాఖపట్నం లో ఏం చేస్తున్నారో చూడండి .

Audrey Truschke’s pastor father-in-law caught violating Indian visa laws

లిబరల్స్ అంటారో ప్రొఫెసర్లు అంటారో వీళ్ళని. వీళ్ళ రాముడిని , హిందూ గ్రంథాలని, పండగలని ఎలా మాట్లాడుతారో చూడండి

August 14th

 Partition Horrors Remembrance Day

 ఆలస్యమైనా ఈ పోస్టు పెట్టాలి అనుకున్నాను.

రామాయణంలో అద్భుతమైన ఘట్టం గంగావతరణం. గంగావతరణం ఎలా జరిగింది అనేది రాముడికి విశ్వామిత్రుడు వివరిస్తాడు. రామచంద్రుడి పూర్వికులైన సగరచక్రవర్తి అశ్వమేధ యాగం చేస్తున్నపుడు కపిల మహర్షి ఆగ్రహాగ్నికి గురై సగరచక్రవర్తి కుమారులు బూడిద కుప్పలైపోతారు. వారికి తర్పణం ఇవ్వటం కోసం భగీరథుడు చేసిన ప్రయత్నమే గంగావతరణం. గంగ స్వర్గం నుంచీ భూమి మీద పడి పాతాళంలో వెళ్ళే క్రమంలో బోలెడు ఇబ్బందులు. అవన్నీ కూడా ఓర్పుతో ఎదుర్కొంటాడు భగీరథుడు. ఇది అందరికి తెలిసిన కథ. తన పూర్వీకుల గురించి తెలుసుకున్న రాముడు అటువంటి వంశంలో పుట్టినందుకు చాలా ఆనందం పొందుతాడు. ఆయన పూర్వీకుల గురించి చెప్పి రాముల వారి వ్యక్తిత్వాన్ని చెక్కుతాడు విశ్వామిత్రుడు అని చాగంటి గారు తరచూ అంటూ ఉంటారు. సరే ఇది రామాయణం. కథ బావుంది. చాగంటి గారు చెప్తే చాలా చాలా బావుంటుంది. విందాం. పుణ్యం తెచ్చేసుకుందాం. చాలా ? సరిపోతుందా అది?

ఇప్పటికే నేను చాలా సార్లు అనిన మాట ‘మన రాబోయే తరాలు మన చరిత్ర తెలుసుకోవడం ముఖ్యం’ అని . ‘Past is Past’ అని వదిలేయచ్చు. పైన రామాయణం కథలో భగీరథుడు కూడా ఆ విధంగా వదిలేస్తే గంగ భూలోకంలోకి రావడం ఉండదు. శ్రీరామచంద్రుడికి విశ్వామిత్రుడు వివరించడం ఉండదు. కదా? భారతదేశానికి స్వాతంత్య్రం వచ్చి 75 ఏళ్ళు. అంటే మూడో తరం వారు వచ్చారు. మరి ఈ మూడో తరానికి వారి ముత్తాతలు, ముత్తవ్వలు చేసిన త్యాగాలు ఎవరు చెప్తారు? అసలు బ్రిటిష్ వారు అనే కాదు. అంతకుపూర్వం ఎన్నో విదేశీయుల దాడులు. వాటిని ఎదురుకుంటూ → ఒక్క రోజు కాదు. రెండు రోజులు కాదు. కొన్ని వందల ఏళ్ళ పాటు భారతదేశం లోని మన పూర్వికులు చేసిన త్యాగాలు అంతా ఇంతా కాదు. ఏది ఏమైనా, ఎన్ని బాధలు వచ్చినా ఈ ధర్మాన్ని వదల్లేదు (Goa Inquisition is the best example ). ఈ రోజు ప్రపంచంలో ఎక్కడ ఉన్నా మనం గర్వంగా చెప్పుకుంటున్నాము అంటే వారు చేసిన త్యాగఫలితమే. భారత దేశ విభజన ఎన్నో లక్షలమందిని పొట్టన పెట్టుకుంది. మతం ఏదైనా కానీ అంతా భారత జాతే కదా? ఆ విభజనని కళ్ళారా చూసిన వారు ఇంకా కొందరు బ్రతికే ఉన్నారు. ఎంత పెద్ద Psychological trauma వారికి అన్న సంగతి మనం ఆలోచించామా ? ఆగష్టు 14ని ఆ విధంగా గుర్తించడం వారికి కొంత స్వాంతన. అందులో రాజకీయాలు ఉండవచ్చు/ఉండకపోవచ్చు. కానీ ఆనాడు బ్రిటిష్ వారు చేసిన అల్లకల్లోలం గురించి ప్రపంచానికి చాటి చెప్పడానికి ఇంతకంటే సరియైన మార్గం ఇంకొకటి ఉన్నది అని నేను అనుకోవడం లేదు. భారత ప్రభుత్వాన్ని తప్పకుండా అభినందించాల్సిందే అంటాను కూడా .

ఇంకొక మాట కూడా. ఎవరికి తోచిన రీతిలో వారు, మన పూర్వికులు మన కోసం ఇంత భద్రంగా కాపాడి ఇచ్చి వెళ్లిన హిందూ ధర్మాన్ని రక్షిద్దాం. . అదే మనం మన పూర్వికులకి త్యాగానికి ఇచ్చే నివాళి🙏🙏

#PartitionHorrorsRemembranceDay

మన వేళ్ళ తోటే మన కళ్ళు పొడుస్తున్నారు…. తెలుసుకోండి

Christianity/Bible/Abrahamic religions గురించి పెద్దగా ఏమీ తెలీదు నాకు. దాదాపుగా ఓ ఆరు నెలల నుంచీ తెలుసుకుంటున్నాను.

1)ఆ మతం యొక్క చరిత్ర తెలుసుకోవాలన్న కుతూహలం ఒకటి.

2)ప్రపంచంలో ఎక్కువ శాతం అనుసరించే మతం ఎలా అయింది అన్న కుతూహలం ఇంకొకటి.

3) భారతదేశంలో ముఖ్యంగా ఆంధ్రాలో (Google map ఆధారంగా) చర్చిలు వెలుస్తున్నాయి, ఇంతలా వ్యాప్తి చెందుతోంది. 600 ఏళ్ళ క్రితం వచ్చిన బుడతకీచులని , ఆ తరువాత వచ్చిన ఆంగ్లేయులను అబ్బుర పరచిన వైదిక సంస్కృతిని వదిలేసి, మన భారతీయులుఆ ధర్మాన్ని ఆచరిస్తున్నారు అంటే ఏముంది అని కూడా ఒకటి.

అలా బైబిల్ చదవటం మొదలుపెట్టాను.

బైబిల్ గ్రంథం :

మొదటి భాగం అంటే First Testament లో మొదటి నాలుగు భాగాలు చదివాను( తెలుగు బైబిల్లో ఒక ఒక్కో భాగాన్ని ఓ ‘కాండ’ అని పేరు వ్రాసారు. ‘ గోత్రాలు’ అనే పదం కూడా బాగా వాడతారు. ). Numbers(సంఖ్యా కాండము) , Deuteronomy కూడా కొంచెం చదివాను. Genesis కి ‘ఆదికాండము’ అనిపెట్టారు. అందులో భూమి, పగలు రాత్రి పుట్టుకలు. మొదటి మానవులు Adam & Eve. మధ్యలో సర్పం రావటం… Noah Ark & great flood ఇది ఇదివరకూ కూడా విన్నాను. తర్వాత చదివిన రెండిటిలో (Exodus నిర్గమకాండం , Leviticus లేవీయకాండం) ఎన్నో బలి ఆచారాల గురించి, దేవుడి మహిమ గురించి, దేవుడి పెట్టిన పది నిబంధనల గురించి చెప్తారు. చదివిన వెంటనే చాలా ప్రశ్నలు వచ్చాయి. దేవుడేంటి, తన మాట వినకపోతే/తనని నమ్మకపోతే మనుష్యుల్ని నరికివేయడం/ రాళ్లతో కొట్టి చంపేయడం ఏమిటి అని చాలా ఆశ్చర్యం వేసి సమాధానం వెతికాను. తెలిసీ తెలియకుండా ఒక నిర్ధారణకు రాకూడదని ఆ విన్న/ చదివిన సమాధానాలు కూడా పక్కన పెట్టేసాను. చాలా చాలా ఆశ్చర్యం వేసినవి బానిసత్వం, ఆడవారికి పురుడు/నెలసరి వచ్చినపుడు కానీ ఎన్ని రోజులు అపవిత్రులు అవుతారో కూడా చెప్పడం. యాజకులు అనే వారు ఎవర్ని పెళ్లిచేసుకోవాలో కూడా చెబుతాయి నిబంధనలు. (ఎందుకంత ఆశ్చర్యం అంటే హిందూ స్త్రీలకే చాలా నియమనిబంధనలు అన్నట్లు మాట్లాడుతారు కదా. ఎన్నో ప్రవచనాలు విన్న నాకే అనిపించేది ఇతర మతగ్రంథాలలో ఇవన్నీ ఉండవు కాబోలు అని . అందుకే స్త్రీ వాదులంతా ఇలా మాట్లాడతారు అని) . అన్నిటికంటే ఆశ్చర్యం ఏంటంటే 40 ఏళ్ళు అలా అడవులు పట్టుకు తిరగడం ఏమిటి అని.

ఏసుక్రీస్తుల వారి గురించి తెలుసుకుందాం అని First Testament ఆపేసి Second Testamentలో Mathew చదివాను. ఇందులో Jesus పుట్టుక చెప్తారు కానీ ఆయన Jerusalem కి వచ్చేవరకు మధ్యలో ఏం జరిగిందో చెప్పరు. అదొక puzzle లాగా అనిపించింది. Mathewలో ఏసుక్రీస్తుల వారు చేసే ఉపదేశం పెద్దగా లేకపోగా ఆయన చేసే స్వస్థత(healing) గురించే ఎక్కువ చెప్పారు. మరి మిగతా బైబిల్ లో ఏమన్నా ఉందేమో తెలీదు. PBS లో Jesus Christ గురించి 1998 నాలుగు గంటల documentary చూసా. నేను ఆశించిన ఉపదేశం (అంటే తత్వబోధ లాంటిది అన్నమాట) చెప్పడం లాంటి విషయం అక్కడ కూడా దొరకలేదు.

భారతీయ తత్త్వం :

ఇక్కడ నేను ఏ మతాన్ని దూషించడం/ విమర్శించడం లేదు. అది గమనించమని నా మనవి. బైబిల్ చదువుతున్నంతసేపు నేను తెలియకుండానే హిందూధర్మంతో పోల్చుకుంటూ ఉన్నాను. హిందూ ధర్మంలో ప్రతీ దాంట్లో తర్కం వెతకడం, ఎందుకిలా చేయాలి అని ప్రశ్నించడం అనేది మనసుకి బాగా అలవాటయిపోయింది. పైగా ప్రవచనాలు చెప్పేవారు కూడా ‘నాకు తెలుసు మీలో ఈ ప్రశ్న వస్తోందని’ అని చెప్తూ ప్రతీదీ వివరిస్తారు. జగ్గీ వాసుదేవ్ సద్గురు గారు చెప్పినట్లు హిందూ ధర్మంలో ప్రతీదీ ప్రశ్నే. రామాయణం, మహాభారతం, భాగవతం అన్నీ ప్రశ్నలతోటే మొదలయ్యాయి. హిందూధర్మంలో ఏ భగవదస్వరూపమైనా సరే భక్తికి లొంగిపోవలసిందే. ‘నిన్ను మించిన శక్తీ ఏదీ లేదు’ అని చెప్తుంది హిందూ ధర్మం. బహుశా Abrahamic religions తప్ప ఇంకొకటి తెలియని వారికి చాలా ఆశ్చర్యం వేస్తుంది. ఇలా దేవుడేంటి, భక్తికి లొంగి పోవడం ఏమిటి అని. ఎందుకంటే బైబిల్ లో ‘దేవుడు’ అనే వాడికి మానవమాత్రుడు చాలా భయపడాలి. ఏసు క్రీస్తుల వారు జెరూసలేం లో బోధనలు మొదలు పెట్టకముందే భారతావనిలో బుద్ధుల వారు వచ్చారు & వెళ్లారు. ఆ వెంటనే ఆది శంకరుల వారు వచ్చి భరత ఖండం అంతా తిరిగి అద్వైత సిద్ధాంతాన్ని, ఎన్నో తార్కిక వాదనలు చేసి వేదాంతాన్ని చెప్పి పీఠాలు కూడా పెట్టేసి వెళ్ళిపోయారు. దేశంలో ఆ మూలా నుంచీ ఈ మూల వరకూ తిరుగుతుంటే భరతఖండంలో పరిపాలించే రాజులు వీరిని దండించినట్లు లేదు. అప్పటికే గురుకులాలు ఉన్నట్లు తెలుస్తోంది కదా?

ఈ smart ఫోన్లు వచ్చి మనం dumb అయ్యాం కానీ ఓ మారుమూల పల్లెటూర్లో పుట్టి , ఏ చదువు కూడా చదవకుండా బోలెడు వేదాంతం మాట్లాడేవారు. అందుకు చక్కటి ఉదాహరణ ఈమధ్య మంగ్లీ పాడిన ఓ తత్త్వం ‘నా గురుడు నన్నింకా యోగి గమ్మనెనే’ . మల్కి దాసు అనే వారు వ్రాసిన ఓ తత్త్వం. ‘అమర నారేయ ‘ అనే గాజులు అమ్ముకునే భక్తుడు కృష్ణుడి మీద తత్వాలు వ్రాస్తే అవి బాలమురళి వారు బాణీ కట్టి వెలుగులోకి తెచ్చారు. అంత అద్భుతమైన philosophy ఏ University కి వెళ్తే వస్తుంది? అంతా నరనరాలా జీర్ణించుకుపోయిన కర్మ సిద్ధాంతం కదూ?

ఎక్కడో పుట్టిన ఈ మతాలు ప్రపంచం అంతా వ్యాపించి, భారత దేశానికీ వచ్చి అన్ని దాడులు & బలవంతంగా మార్పిడులు చేసినా కూడా ఇంకా ఈ రోజుకి మిగిలి ఉంది అంటే మతం మారినా కూడా ఆలోచనాధోరణి అన్నది మారకపోవడం అతి ముఖ్య కారణం. పాపభీతి, కర్మ సిద్ధాంతం అనేవి నరనరాలా జీర్ణించుకుపోయి ఉండటం. అందుకు ఉదాహరణలు ఉస్తాద్ బిస్మిల్లా ఖాన్, అబ్దుల్ కలాం, అయ్యప్ప స్వామిని తన హారతి పాటతో నిద్రపుచ్చే జేసుదాసు గారు.

ఇప్పుడు భారతదేశం :

బైబిల్ అనేది క్రైస్తవ ధర్మం గురించి చెబుతుంది. ఇష్టమయినవారు ఆ మతాన్ని స్వీకరిస్తారు లేకపోతే లేదు. ఎవరైనా హిందూ ధర్మం వదిలి క్రిస్టియన్ మత ధర్మం పుచ్చుకోవచ్చు. తప్పేమీ లేదు. అది భారతదేశంలో రాజ్యాంగం ఇచ్చిన హక్కు. మత ప్రచారం చేసుకోవడానికి హక్కు ఉందిట కాబట్టి నేను దానిని ప్రశ్నించడం లేదు & విమర్శించడం లేదు. కానీ ఒక business model క్రింద తయారవుతోంది అని ఖచ్చితంగా చెప్పగలను. ‘నువ్వు మతం మారు . నీతో పాటు పది మందిని మార్చు ‘ అనేదే concept .

నేను గమనించింది ఏంటంటే తెలుగు వారిలో ఈ బైబిల్ బోధకులు హిందూ మతాన్ని ఎందుకూ పనికి రాని మతంలాగా చెబుతూ ద్వేషించేలా బోధిస్తున్నారు. ఏదో ఒక విధంగా విగ్రహారాధనని ఖండించడం, హిందువులని ‘అన్యులు’ అంటూ చాలా చులకన మాట్లాడటం. అసలు వీరు నిజంగా certified వారేనా అన్న అనుమానం కూడా. ఒకప్పుడు వీరు అందరూ హిందువులే. కానీ వీరి దూషణ చాలా తీవ్ర స్థాయిలో ఉంది. ‘అందరూ ఏసుక్రీస్తుని కొలవాలి ఆయనే నిజదేవుడు . కాబట్టి ఈ దేవుడినే పూజించాలి’ అని చెబుతూ , ‘భారతదేశం అంతటా దేవుని రాజ్యం విస్తరించాలి’అని బోధించడం చాలా వీడియోల్లో చూసాను. ఓ డాక్టరేట్ పాస్టర్ గారట. గొంతు చించుకుని అరుస్తున్నారు ‘మోదీ గారిని దేశం మొత్తం ఏసు ప్రభువుని నమ్ముకుంటుంది అని చెప్పమని చెప్పండి. వెంటనే కరోనా మాయం అవుతుంది. దేవుడికి కోపం వస్తే ఇలాగే జరుగుతుంది’ అని.

ఇక సాక్ష్యాలు వింటుంటే మతి పోతుంది. పైగా యువతని వినమంటారు వీళ్ళు. ఏసు ప్రభువు నీళ్ళలో కనిపించారు అంటుంది జయసుధ. ఇంకొకావిడ అలా పోతూ పోతూ చేయి ఊపారు అంటుంది. ఒక వీడియోలో ఒకావిడ సాక్ష్యం చెప్పటం మొదలు పెడుతూనే ‘ హిందువులు నిజ దేవుడిని తెలుసుకోలేని గుడ్డివారు’ అంటూ మొదలుపెట్టింది. మనకి కావలసిన విధంగా అన్నీ జరుగుతుంటేనే దేవుడా ? spirituality అంటే కష్టం వస్తే ఎలా manage చేసుకోవాలో చెప్పడం కదా ? దేవుడు అంటే మహిమలేనా ? మహిమలు చూపిస్తేనే దేవుడు దేవుడవుతాడా? మన పాపకర్మలతో పనిలేదా? పెద్ద కష్టం వస్తే తట్టుకునే వాళ్ళని ఎంతో మందిని చూస్తున్నామే . అసలు వీళ్ళెవరు నిర్ణయించడానికి హిందువుల దేవుళ్ళు నిజమైన వారో కాదో ? అదే భారత రాజ్యాంగంలో ఇంకో మతం దూషించకూడదు అని లేదా?

ఇక ఈ బోధకులు షార్ట్ వీడియోలలో ఆడవారు ఏ బట్టలు వేసుకోవాలి , పెళ్ళిళ్ళు చేసుకునేటపుడు పసుపు, తమలపాకుల లాంటివి దేవుడి వాక్యంలో లేవు కాబట్టి వాడద్దు అని సందేశాలు పంపుతున్నారు. ‘అన్యులు’ చేసిన ఆచారాలు పాటించద్దు అని చెపుతున్నారు. అంటే వేషధారణ లాంటివి మార్చేస్తున్నారన్నమాట. consumersని attract చేయాల్సివచ్చినపుడు స్తోత్రాలు, సహస్రనామాలు చేయిస్తూ హిందూ మతం లాంటిది ఈ మతం అని చెబుతున్నట్లున్నారు. consumers commit అయ్యాక ఇక నువ్వు ఇదే product వాడాలి అన్నట్టు, ఇలా నియమనిబంధనలు ఉన్న వీడియోలు చూపిస్తున్నారా అనిపించింది. వీరందరూ ఒకప్పుడు హిందువులే. ఒకప్పుడు అంటే ఎప్పుడో కాదు. ఓ పది/ పదిహేనేళ్ళు అయి ఉంటుంది అంతే. అంటే మన వారే. కానీ ఎక్కడో ఇజ్రాయెల్ వారికి పుట్టినట్లు మాట్లాడుతారు. హిందూ మతంలో కుల వివక్ష గురించి చెప్పే వీరు బైబిల్ లో బానిసత్వం గురించి ఏ మాత్రం ప్రస్థావించరు . హిందూ మతంలో స్త్రీ వివక్ష అని చెప్పే వీరు బైబిల్ లో స్త్రీకి ఉన్న నియమ నిబంధనల గురించి ఏ మాత్రం చెప్పరు .

ఎలా ఉండే భారతీయులు ఎలా అయ్యారో చూడండి. ఇంత కంటే దారుణం ఏముంటుంది ?

నేను చెప్పిన వీడియోలు ఇవే

‘స్వస్తిక్’ గుర్తు గురించి మాట్లాడొచ్చా?

హిందువుల పండుగలప్పుడు ముఖ్యంగా దీపావళి ముగ్గులలో సర్వసాధారణంగా కనిపించేది స్వస్తిక గుర్తు. ఇది శుభానికి సంకేతం. ఇది భారతీయ హిందువులకి అందరికీ తెలిసినదే.

అమెరికాకి వలస వచ్చాక కానీ కొందరు హిందువులకి తెలియదు ఇది ఎక్కడపడితే అక్కడ వాడితే ప్రమాదాల్లో ఇరుక్కుంటారని. ముఖ్యంగా భారతదేశం నుండీ వచ్చే విద్యార్థులు ఖచ్చితంగా తెల్సుకోవాలి.

ఈ మంగళప్రదమైన గుర్తుని 45 డిగ్రీల కోణంలో తిప్పి తమ తమ స్వార్థ ప్రయోజనాల కోసం యూదు జాతి మీద ప్రయోగించి మారణహోమం సృష్టించారు కొందరు దుర్మార్గులు. అందుకే ఈ గుర్తుని ఒక ‘hate symbol ‘ గా అమెరికాలో పరిగణిస్తారు. కొన్ని రాష్ట్రాలు, బడులు చట్టాలు కూడా చేసాయి.

మూడు రోజుల క్రితం ఒక ప్రభుత్వ కార్యాలయంలోని లిఫ్ట్ లో ఈ గుర్తు కనిపించిందని అమెరికా అధ్యక్షులు ఇటువంటి హింసాత్మకమైన ఆలోచనలకి ఇక్కడ చోటు లేదు అని స్పష్టంగా ఖచ్చితంగా చెప్పారు. ఎవరు పెట్టారు ఏమిటీ అనేది కూడా investigation కూడా జరుగుతుంది అనేది కూడా చెప్పారు. ఆయన చెప్పింది అక్షరాలా సరియైనదే. దాన్లో సందేహం లేదు.

ఇక్కడ నేను చెప్పేది ఏంటి అంటే అమెరికా లో హిందువులు కూడా నోరు విప్పి మాట్లాడాలి. మాట్లాడకపోతే కూడా జరిగే నష్టాలు ఉంటాయి. అడగనిది అమ్మైనా అన్నం పెట్టదు. ఇదివరకు రోజుల్లో ఇంట్లోనే పూజలు చేసుకునే వాళ్ళం. బాధ లేదు. ఇప్పుడు పూజ చేసాక దాన్ని సోషల్ మీడియాలో పెడుతున్నాం. ఆ స్వస్తిక్ గుర్తు కలశం మీద ఉండవచ్చు . తోరణాలలో ఉండచ్చు. ముగ్గులలో ఉండచ్చు. పని చేసే కార్యాలయాలలో అవి ఉన్న ఫోటోలు పంచుకుంటే, అవతల వ్యక్తికి హిందూ మతం మీద అవగాహన లేకపోతే మీ గురించి రిపోర్ట్ వెళ్ళిపోతుంది . తప్పులేదు. చెప్పా కదా ఇక్కడ బడులలో కూడా చట్టాలు చేసారు. ఆ బడులకు వెళ్ళే హిందూ పిల్లలు పరిస్థితి ఒకసారి ఆలోచించండి. ఒక పక్క ‘మన సంస్కృతి కాపాడు’ అంటాము. ఓ పక్క ‘బయట దీని గురించి అస్సలు ఏమీ మాట్లాడకు’ అంటాము. సోషల్ మీడియాలో వాగ్యుద్దాలే జరుగుతుంటాయట. అమెరికాలో అవతల వారికి ఏ ఇబ్బందీ కలిగించకుండా ఎవరి మతం వారు పాటించవచ్చు. అది రాజ్యాంగం ఇచ్చిన హక్కు. అందర్నీ కలుపుకు పోవడమే ఉద్దేశ్యం. నేను బహిరంగంగా హిందూ మత గొప్పదనం గురించి చెప్పమని చెప్పట్లేదు. తెలియని వారికి అవగాహన కలుగ జేయండి అంటున్నాను. Jewish స్నేహితులు ఉన్నట్లయితే వారితో interfaith పెట్టి చెప్పవచ్చు. వారి పిల్లలకి మన పిల్లలకి dialogue ఏర్పాటు చేసుకోవచ్చు. మీ ఇంటి చుట్టు పక్కల వారికీ చెప్పవచ్చు. మన బాధ మనం చెప్పకపోతే ఎవరూ వచ్చి చెప్పరు. వారికి తెలియదు కాబట్టి.

HAF వారు దీని గురించి చాలా పోరాటాలే చేసారు. న్యూయార్కు రాష్ట్రం లో చట్టం రాకుండా ఆపగలిగారు. మనం ఏమీ కష్టపడకుండానే చక్కటి వీడియో కూడా రూపొందించారు. అవి పంచుకుంటే చాలు. https://www.hinduamerican.org/swastika-reporters-guide

వీలైతే వీరికి donation కూడా ఇవ్వండి. వీరి ‘Dharma Ambassador’ కార్యక్రమంలో పాల్గొనండి. 5 నిముషాలలో హిందూమతం అంటే తెలియని వారికి ఎలా చెప్పాలో నేర్పిస్తారు. ప్రతీ నెలా ఒక session ఉంటుంది. Online లోనే .

కన్యాకుమారి

యావత్ భారతదేశం గురించి చెప్పేటప్పుడు తరచుగా మాట్లాడే మాట ‘ కాశ్మీరు నుండీ కన్యాకుమారి ‘ వరకూ అని. కన్యాకుమారి అనే ప్రదేశం భారతదేశానికి ఓ సరిహద్దు మాత్రమే కాదు. అమ్మవారు నివసించే ఓ పుణ్యక్షేత్రం కూడా. కన్యాకుమారి అమ్మవారు శివుని కోసం ఈనాడు అనబడే వివేకానంద rock మెమోరియల్ మీద తపస్సు చేసినది అని పురాణం. అమ్మవారి పాదాలు కూడా అక్కడ ఉంటాయి.

అమ్మవారు పెళ్ళి చేసుకోకుండా కన్యలాగా ఉండిపోవడానికి ఓ స్థల పురాణం/కథ ఉంది. బకంచి కామాక్షి, మధుర మీనాక్షి, కాశీ విశాలాక్షి, కన్యాకుమారి అందరూ అక్కాచెల్లెళ్లు. వాళ్ళని పెళ్లిళ్లు చేసుకున్నాక శివుడు ఈవిడని పెళ్లి చేసుకుంటానంటాడు. ఆ చెప్పిన సమయానికి రాకపోవడం, ముహూర్త సమయం మించి పోవడంతో ఈవిడకి కోపం వచ్చి పెళ్ళి చేసుకోకుండా కన్యలా ఉండిపోతుంది. అంతేకాక ఆ పెళ్ళి మండపంలో ఉన్న వస్తువులని చూసి శపిస్తుంది. అందుకే అక్కడ ఇసుక రకరకాల రంగుల్లో కనిపిస్తుందని చెప్తారు.

2016 లో మేము కన్యాకుమారి వెళ్ళాము. ఆ అమ్మవారిని చూసాక గుడిలో ఏదో విగ్రహమా ఆ తల్లే అలా మనకి దర్శనం ఇస్తోందా అనేది ఆవిడని స్వయంగా దర్శనం చేసుకుంటేనే అర్ధమవుతుంది. అసలు అక్కడ నుంచీ కదలబుద్ధి కాదు. అంత అద్భుతం!!. ఈవిడ ముక్కు పుడక ఎంత మెరిసిపోతుంది అంటే నావికులకి దిక్సూచి లాగా ఉండేదిట. ఇక వివేకానంద rock మెమోరియల్. సముద్రం మధ్యలో ఉంటుంది. ఆయన ఆ సముద్రంలో ఈత కొడుతూ ఆ ప్రదేశాన్ని చేరుకున్నారు. అక్కడే మూడు రోజుల పాటు ధ్యానంలో ఉండి పోయారు. అక్కడే వారికి జ్ఞానోదయం కలిగింది.

మేము వెళ్ళినపుడు హోటల్ సముద్రానికి ఎదురుగా తీసుకున్నాము. రూమ్ లో నుంచి గుడి, వివేకానంద rock మెమోరియల్, సూర్యోదయం అన్నీ కనిపిస్తాయి. పక్కనే ఓ చర్చినో ఏదో ఉంది. రాత్రి కాసేపు అయ్యేసరికి భక్తి గీతాలు మొదలు పెట్టారు. అర్ధరాత్రి వరకూ అదే తంతు. పుణ్యక్షేత్రానికి వచ్చామా ఇది వినడానికి వచ్చామా అనిపించింది. ఇదే అనుభవం కావాలంటే అమెరికాలోనే దొరుకుతుంది కదా. అక్కడిదాకా మేము ఎందుకు వెళ్లడం చెప్పండి? ఇది వేరే మతాన్ని దూషించడం కాదు. అమ్మవారి గుడి పక్కనే చర్చి ఏమిటి ? ఆ పాటలు ఏంటి ? భారత దేశంలో చర్చి అనేది కొత్తగా వచ్చింది. గుడి అంతకుముందే ఉండినదే కదా. ఇక్కడ ఇంకో మతాన్ని గౌరవించాలి అన్న ఇంగితం లేనిది ఎవరికి?

అంతకుముందు మధురలో కృష్ణుడుని చూద్దాం అని వెళ్తే ఇదే అనుభవం. పక్కన మసీదులో మైకులో ప్రార్థనలు.

ఇతర మతాల పుణ్యక్షేత్రాలలో వేరే మతాల వారు ఉంటారా ? హిందూ మతంలో పుణ్యక్షేత్రాలు అంటే భారతదేశంలోనే చూడాలి. ప్రపంచంలో ఇంకో చోట లేవు. మరి ఇంక పవిత్రత అనేది ఏముంటుంది? ఈ మాట అడిగితే ‘అన్నీ మతాలు ఒకటే. హిందువులకే ఈ మధ్య పిచ్చి పట్టి మతోన్మాదం ఎక్కువయింది’ అంటారు. ఒక పుణ్యక్షేత్రంలో ఆ దేవీదేవుళ్ళ తాలూకు ఆనవాళ్ళు మాయం అయి ఇంకేవో కనిపిస్తుంటే ఆ సంస్కృతి ఉన్నట్టా ? పోయినట్టా?

‘Rakalokam’ ఛానల్ లో కన్యాకుమారి మీద వారి వీడియో చూడండి. నా బాధ ఏంటో అర్ధమవుతుంది.

భావితరాలకి భావజాలం పాఠాలు

అన్వేషి  ఛానల్ వారి వీడియో ఒకటి చూసాను. దాని సారాంశం ఏమిటంటే  ప్రపంచంలో  ఎన్నో  సంస్కృతులు కనుమరుగు అయిపోయినా ,  ఎన్నో వేల  ఏళ్ళ  చరిత్ర  కలిగి &  బ్రతికి ఉన్న ఒకే  ఒక  సంస్కృతి భారతీయ సంస్కృతి అని.  కానీ  బాధ ఏంటంటే ఈ సంస్కృతిని  రక్షించాల్సింది/రక్షించుకోవాల్సింది  పోయి  దీనిని కనుమరుగు చేయాలనే కంకణం  కట్టుకున్నారు చాలా మంది.  ఇది  వరకు పరాయిదేశం నుంచీ/ పరాయి వారి నుంచీ  భౌతిక దాడులు ఉండేవి. ఇప్పుడు ప్రస్తుతం  కొన్ని  వింటుంటే సంస్కృతి మీద  దాడి రకరకాల రూపాలు సంతరించుకుంటుంది  అనిపిస్తోంది.  మొన్న పిల్లలకి పాఠాలు చెప్పే వంకతో  తమ భావజాలాన్ని వారికి నేర్పించే కొన్ని వీడియోలు చూసాను. 

మేము  హైదరాబాద్ లో మాడపాటి హనుమంత రావు గారి బళ్ళో చదువుకున్నాము. ఆ బళ్ళో చదివాను కాబట్టే  ఈ మాత్రం తెలుగు చదువుతున్నాను.  సంస్కృతి అంటూ ఏదో  ఒకటి చెప్తుంటాను.  మా బళ్ళో భోజనాల సమయంలో భగవద్గీత బోధించేవారు.   గాంధీ గారి వర్ధంతి రోజు తప్పనిసరిగా గీత చదివేవారు.      

Final  exams  ముందు ప్రతీ తరగతి వారితో  సరస్వతీ  దేవి పూజ చేయించేవారు.   మా  బళ్ళో భవనాల పేర్లు  మొల్ల, ఝాన్సీ , గార్గి,  సరోజినీ దేవి,  లీలావతి,  మయూరి ఇలా ఉండేవి.  మా బడి బ్యాడ్జి  సూర్యోదయం లో విచ్చుకుంటున్న తమ పూవులతో ‘సత్యం, శివమ్ , సుందరం’  అని వ్రాసి ఉండేది.   చక్కగా  జడలు వేసుకుని , పూవులు, బొట్టు పెట్టుకుని వెళ్ళే వాళ్ళం.  ఒక మతాన్ని/సంస్కృతిని దూషించడం అనేది నా గురువుల దగ్గర వినలేదు.  ఈ ఫలానా  సంస్కృతే పాటించాలి అన్న నియమం కూడా ఉండేది కాదు.  అన్ని బళ్ళలో లాగే  ఎన్నో పోటీలు  ఉండేవి.  ‘పైసా fund’  అంటూ  ప్రతి తరగతిలో  గల్లా పెట్టె ఒకటి పెట్టి , వచ్చిన డబ్బులతో పేద విద్యార్థులకి యూనిఫామ్ కుట్టించేవారు.  లైబ్రరీ,Labs  ఉండేవి ఆ రోజుల్లో.  ఉన్నత తరగతి నుంచి పేద విద్యార్థుల వరకు అందరం కలిసి చదువుకునేవారం. మా యూనిఫామ్ లంగా & ఓణీ  లేదా చుడీదార్. 

ఇప్పుడంటే choice  పెద్దగా  లేదు కానీ, ఆ రోజుల్లో  తెలుగు/ఆంగ్ల మాధ్యమం అనే  choice  ఉండేవి. ఆంగ్ల మాధ్యమంలో  చదువుకోలేని  చదువు ఓ చదువే కాదనుకునేవారు చాలా మంది తల్లితండ్రులు (మా నాన్న గారు ఈ బడి బావుంటుంది అంటే చేదు మొహం పెట్టిన వారిని కూడా చూసాను నేను)   ‘St. ‘ అన్న మాట ఉంటేనే ఆ బళ్ళలో చేర్చే వారు. కొన్ని బళ్ళలో తెలుగు నేర్పేవారు కాదు. Rosary convent  ఒకటి అనుకుంటా అందులో. Please correct me if I am wrong.  దానితో  తెలుగు భాష అనేది ఆ తరంలోనే ఆగిపోయింది కొందరి కుటుంబాలలో.  ఆ బళ్ళలో తెలుగులో మాట్లాడితే fine, పూలు  & గాజులు వేసుకుంటే fine కట్టేవారు.  పైగా కొంతమంది అదొక గొప్పలా  చెప్పుకునేవారు. ఆ అమాయకత్వాన్ని తల్చుకుంటే ఇప్పుడు నవ్వొస్తుంది. ఒకటి రెండు సార్లు  Inter  school  competitions/field  trips  వెళ్ళినప్పుడు మేము ‘మాడపాటి ‘ అని పేరు చెప్పగానే వెంటనే ‘మీ మొహంలే ‘ అన్నట్టు ఆంగ్లంలో మాట్లాడుకుంటూ ఉండేవారు. వాళ్ళు  తెలుగు  చదవకపోవడం వల్ల  నష్టం ఏముంది అని ప్రశ్నిస్తే  , నా సమాధానం ‘ వాళ్ళకి  ఆంగ్లం ఒక్కటే వచ్చు.  నాకు ఆంగ్లంతో పాటు  తెలుగు కూడా వచ్చు’ .  తెలుగు నేర్చుకోవడం అంటే నాకు తెలియకుండానే  నా ఉనికి నేను తెలుసుకున్నాను.  ఇంకో తరానికి కాస్తో కూస్తో నేర్పిస్తున్నాను. ఓ విశ్వనాథ  అంటే ఎవరో తెలుసు.  ఆయన  ఏమి వ్రాసారో తెలుసు. ఇంకో  తరం వారికి కాస్తో కూస్తో ఆయన  గొప్పతనం చెప్పగలను.    ఆయన రచనల భండాగారం తలుపులు తీసే తాళంచెవి ఖచ్చితంగా అందివ్వగలను.  ఆ రోజుల్లో తెలుగు నేర్చుకోలేని వారికి  వారి జీవితకాలం లో ఓ రైలు తప్పిపోయినట్లే. 

సంస్కృతిని  బ్రతికించాలా  చంపేయాలా అనేది మన చేతుల్లో  ఉంటుంది అనటానికి ఇంతకంటే ఉదాహరణ ఏం  చెప్పగలను? మన పిల్లలు తెలుగు చదవి దాన్నేం ఉద్దరించక్కర్లేదు లేదులే అని అనుకుని చేసిన పని వలన, తెలుగు సినిమాలకే పరిమితం అయిపొయింది.  

ఆ వీడియోల్లో వారికి  కావలసిన భావజాలం నేర్పుతున్నారు. పిల్లలు  రేపు అదే నేర్చుకోని  అదే భస్మాసుర హస్తం వారి మీదే పెడతారు. 

 భారత దేశం పుణ్యభూమి కావడం వలననేమో కొందరు మహానుభావుల పుట్టారు.  అందువలననే  ఎంత నరికేద్దాం అని ప్రయత్నాలు చేసినా,  అటువంటి వారి వల్ల  ఈ మాత్రం కట్టు, బొట్టు, భాష   మిగిలాయేమో  అనిపిస్తోంది ఈ రోజు . 

పౌరోహిత్యం చేసుకునే బ్రాహ్మణుల పరిస్థితి

ఇదండీ పౌరోహిత్యం/ వైదిక కర్మలు చేసుకునే బ్రాహ్మణుల పరిస్థితి.

వీడియోలో రాంబాబు గారి చెప్పినట్లు, పరిస్థితి ఇలాగే ఉంటే మన తరువాత ఇంకో రెండు తరాలు చూస్తారేమో . ఎన్నో రోజులు పట్టదు ఇది అంతరించి పోవడానికి. మరీ అతిగా చెప్తున్నారు ఆయన అంటారేమో. విపరీతమైన మార్పు అనేది గత రెండు దశాబ్దాలుగా జరిగిపోయింది. మనం నిద్ర లేవకుండా తెల్లారలేదు అంటే ఎలా ? ‘ఎందుకు చాదస్తం’ అంటూ సగం వదిలేసాం మనం. ఉన్నది కాపాడుకునే ప్రయత్నం చేద్దాం.

బ్రాహ్మణులు వారి వృత్తి చేపట్టకపోతే ?

ముహుర్తాలు పెట్టే వారు ఉండరు.

పంచాంగాలు వ్రాయడం ఉండదు.

గుళ్ళలో పూజలు ఉండవు. గుళ్ళు విహార స్థలాలు గా మారిపోతాయి.

పెళ్ళిళ్ళు , బారసాలలు, అన్న ప్రాసనలు , పుట్టువెంట్రుకలు , షష్టిపూర్తి , గృహప్రవేశాలు , వ్రతాలు అన్ని రికార్డులు పెట్టి చేసుకోవాల్సిందే.

ఏది చేసినా చేయకపోయినా అపరకర్మలు అనేవి అందరికీ Sentiment. అవి చేసే వారు కరువయిపోతారు.

బ్రాహ్మడి ఈ పరిస్థితికి కారణం ఏమిటి? అన్ని క్రతువులు చేసుకోవాలి అనుకునే మన అందరికీ ఆ వృత్తి మీద నమ్మకం /గౌరవం లేకపోవడం. ఇహ సినిమాల్లో వీళ్ళ మీద జోకులు చెప్పనే అక్కరలేదు. ఆహారం, కట్టు, బొట్టు దగ్గర నుంచీ ఎన్నో నియమాలు పాటించాలి అంటే ఏ ఆడపిల్లలు ముందుకి రారు. అందులోనూ సమానత్వం / నా బట్టలు నా ఇష్టం/ స్త్రీ బానిస కాదు అంటూ మాట్లాడేవాళ్ళు ఈ వృత్తి లో వారిని వివాహం చేసుకుంటారా ? చాలా సార్లు చెప్తుంటాను సంస్కృతిని ఏ విధంగా direct గాను/ indirect గాను కూకటి వేళ్ళతో ఎలా పీకుతారు అని . ఈ రోజు స్పష్టంగా కనిపిస్తోంది. వీరేదో నా కులం వారు అని ఇలా చెప్పడం లేదు. ఈ క్రతువులన్నీ ఆగిపోతే హిందూ ధర్మం అనేది పుస్తకాలకి పరిమితం అవుతుంది. ‘ఉండేదిట ‘ అని చెప్పుకుంటాం. ప్రపంచంలో ఎన్నో తట్టుకుని ఈ రోజు వరకూ నిలిచి ఉన్న సంస్కృతి ఇదొక్కటే. దాన్నిగర్వంగా చెప్పుకుంటూ ‘celebrate ‘ చేసుకోవాల్సింది పోయి వదిలేస్తూ గర్వపడుతున్నాం